Titulli: Qyteti i engjëjve
Origjinali: Stadt der engel
Gjinia: Roman
Autori: Christa Wolf
Shqipëroi: Aristidh Ristani
Shtëpia botuese: Santori
Viti: 2014
Fq. 450
Pesha: 0.572 kg.
ISBN: 978-9928-4116-2-4
Mbi librin
Romani i ri madhor dhe njëherazi vepra e fundit e shkrimtares së njohur gjermane Krista Volf me titull "Qyteti i engjëjve" dhe me nëntitull "The Overcoat of Dr. Freud", libër që autorja i ka kushtuar dhjetë vjet të veprimtarisë së vet letrare, pasqyron jetën e saj lidhur me çaste vendimtare të historisë gjermane.
Në këtë roman përshkruhet qëndrimi nëntëmujor i Krista Volfit në Los Anxhelos me ftesë të Fondacionit Getty (Getty Center), në fillim të viteve nëntëdhjetë. Qëndrimi disamujor i autores në këtë qytet amerikan përkon me një krizë të thellë në jetën e saj, atëherë kur, si pasojë e hapjes së dosjeve të sigurimit të shtetit (Stas) të ish – Gjermanisë Lindore, u zbulua se shkrimtarja, përveç faktit që ishte survejuar e spiunuar prej tij gjatë më se tridhjetë vjetëve, sepse quhej si zë kritik e shqetësues; më përpara, nga viti 1959 gjer në vitin 1962, pati bashkëpunuar me të në mënyrë jozyrtare.
Gjatë qëndrimit në Los Anxhelos, autores i mbërrijnë njoftime rreth fushatës së bujshme që kishte shpërthyer kundër saj në shtypin gjerman, fushatë që pak nga pak ajo s'është në gjendje s'është në gjendje më ta shpërfillë.
Kësisoj, sikurse vë në dukje kritika, libri shndërrohet në një sprovë për të rindërtuar etapat e ngjizjes së një ideje të drejtësisë sociale që vë në qendër të vet qenien njerëzore, dhe në të njëjtën kohë në një përsiatje të kthjellët lidhur me kujtesën e me harresën: "Si munda ta harroja?" është pyetja rreth së cilës vërtitet autoanaliza e tregimtares në vetën e parë, një autoanalizë që shquhet nga një çiltërsi mbresëlënëse, e cila nuk shndërrohet asnjëherë në shfryrje ose në dhënie llogarie.
Romani "Qyteti i engjëjve" i shkrimtares Krista Volf, qysh nga viti 2010, kur u botua për herë të parë në origjinalin gjermanisht, është përkthyer tashmë në 22 gjuhë të ndryshme të botës.
Mbi autoren
Krista Volfi (1929 – 2011) është quajtur nga kritika letrare si një ndër shkrimtaret më të rëndësishme përparimtare të periudhës së pasluftës. Lexuesit e kanë vlerësuar njësoj si në Lindje ashtu dhe në Perëndim të Gjermanisë, dhe është nderuar me çmime të mëdha letrare në Lindje, në Perëndim dhe në Gjermaninë e bashkuar, po ashtu edhe në shumë vende të botës si në Austri, në Francë, në Itali, në Belgjikë, në SHBA etj.
Ajo ka qenë e njohur qysh prej dhjetëra vjetësh në rrafsh botëror dhe veprat e saj janë përkthyer në rreth 40 gjuhë. Në një artikull të botuar në gazetën "Nju Jork Tajms", shkrimtarja dhe kritikja e njohur amerikane Meri Gordon theksonte ndër të tjera: "Kur mbaron së lexuari veprën e Krista Volfit, njeriu e ndien veten të mbushulluar pasi ka bërë një udhëtim në shoqërinë e një profeteje që zhbiron me vëmendje, me dhembshuri e me kurajë mu brenda në zemrën e botës."
