Nje zemer inteligjente, Alain Finkielkraut

Titulli: Një zemër inteligjente
Origjinali: Un cœur intelligent
Gjinia: Kritikë letrare
Autori: Alain Finkielkraut
Shqipëroi: Urim Nerguti
Shtëpia botuese: Tirana Times
Viti: 2012
Fq. 244
Pesha: 0.305 kg
ISBN: 978-99956-809-6-1

Koment nga autori

Mbreti Solomon e luste të Përjetshmin t'i jepte një zemër të zgjuar. Në të dalë të një shekulli të shkretuar nga gjëmat e përbashkëta të burokracisë, domethënë të një zgjuarsie pastërtisht funksionale, dhe të ideologjisë, domethënë të një sentimentaliteti të përgjithshëm, binar, abstrakt, sovranisht shpërfillës ndaj veçantisë dhe brishtësisë së fateve individuale, kujt duhet t'ia drejtosh këtë lutje?

Ky libër i përgjigjet: letërsisë. Duke i besuar emocionit tim, kam zgjedhur nëntë tituj: "Shakaja" të Milan Kunderas, "Gjithçka kalon" të Vassili Grossman, "Historia e një gjermani" të Sebastian Haffner, "Njeriu i parë" të Albert Camus, "Njolla" të Philip Roth, "Lord Jim" të Joseph Conrad, "Fletore nga nëndhesa" të Fjodor Dostojevskit, "Washington Square" të Henry James dhe "Gostia e Babetës" të Karen Blixen. Dhe në këto lexime jam përpjekur të vë tërë seriozitetin tim, tërë vëmendjen që kërkon zbërthimi i enigmave të botës.

Mbi autorin

Alain Finkielkraut është shkrimtar, filozof dhe eseist francez, lindur në Paris më 1949. Autor i mjaft veprave mbi letërsinë, dashurinë, modernitetin, ai mbron nocionin e identitetit, idenë e përcjelljes së vlerave, idenë e trashëgimisë, traditës. Gjithashtu, është shprehur shpesh mbi antisemitizmin dhe racizmin, mbi multikulturalizmin, mbi të metat e sistemit arsimor francez apo edhe mbi luftërat në ish – Jugosllavi.

Ka shkruar në veçanti "Urtësia e dashurisë", "Çrregullimi i ri dashuror", "Çifuti imagjinar", "Ardhmëria e një mohimi: refleksione mbi çështjen e genocidit", "Disfata e mendimit", si dhe ka botuar vëllimin me biseda "Çfarë mund të bëjë letërsia". Jep filozofi në Shkollën Politeknike dhe drejton që nga viti 1985 emisionin "Rèpliques" të France Culture. Alain Finkielkraut është një figurë polemike në mjedisin intelektual francez.