E vërteta mbi shqiptarët e Maqedonisë, Kristo Frashëri

Titulli: E vërteta mbi shqiptarët e Maqedonisë
Origjinali: E vërteta mbi shqiptarët e Maqedonisë
Gjinia: Histori
Autori: Kristo Frashëri
Shtëpia botuese: Dudaj
Viti: 2010
Fq. 112
Pesha: 0.119 kg.
ISBN: 978-99943-0-144-7

Mbi librin

Ky punim ka karakterin e një debati historik shkencor. Fillin e ka marrë nga formulimet historike që përmban "Enciklopedia e Maqedonisë", botuar nga Akademia e Shkencave e Shkupit me 2009, në zërin shqiptarët e Maqedonisë. Në këtë enciklopedi ka formulime të pasakta për historinë e shqiptareve të Maqedonisë.

Aty shqiptarët trajtohen si turma malësorësh të ardhur nga malësitë e Shqipërisë së veriut dhe të vendosur në viset e sotme të Maqedonisë gjatë shekujve të sundimit osman. Historiani Kristo Frashëri u përgjigjet shtrembërimeve që përmban enciklopedia me argumente dhe dokumentime historike.

Argumentet që ai sjell tregojnë se shqiptaret që tani banojnë në viset veriore dhe verilindore të Republikës së Maqedonisë, kane banuar në këto vise që në agimin e historisë. Ata janë banorë ilire të trevës dardane, e cila në Antikitet kishte për kryeqendër Shkupin. Sipas historianit Kristo Frashëri, shqiptarët vazhduan të banonin në këto vise gjatë Mesjetës së hershme. Sipas tij, fiset sllave që u dyndën në shekullin e shtatë të erës sonë u vendosen vetëm në viset e Maqedonisë antike, por jo në Dardaninë historike.

Ai sjell dëshmi se shqiptarët kanë qenë të pranishëm në viset dardane ku banojnë sot edhe gjatë shekujve të Mesjetës qendrore. Shtegtimet e shqiptareve në viset sllavo-maqedonë kanë qenë sporadike, ashtu siç kanë qenë sporadike dhe shtegtimet e banoreve sllavë në viset e sotme shqiptare.

Tezat e akademikeve maqedonë mbi kolonizimin masiv shqiptar në Maqedoni gjatë sundimit osman janë, sipas Kristo Frashërit, hamendësime pa baze dokumentare. Autori parashtron pikëpamjen e vet se shqiptarët e Maqedonisë, të cilët përbëjnë rreth 30 përqind të banoreve të Republikës janë jo emigrantë, por banorë autoktonë të saj. Si të tillë , ata kanë të drejtën e shtetësisë në Republikën e Maqedonisë njëlloj si banorët sllavo-maqedonë të saj.