Hipnotizuesi, Lars Kepler

Titulli: Hipnotizuesi
Origjinali: Hypnotisören
Gjinia: Roman, thriller
Autori: Lars Kepler
Shqipëroi: Ilira Shurbani, Aurora Kënga
Shtëpia botuese: Dituria
Viti: 2011
Fq. 548
Pesha: 0.681 kg
ISBN: 978-9928-103-13-0

Fragment nga libri

"Do të dëgjosh vetëm zërin tim dhe numërimin mbrapsht. Çdo gjë është e qetë, e palëvizshme dhe nuk ka pse të kesh frikë." "Si zjarr, tamam si zjarr". Këto qenë fjalët e para që shqiptoi djali i hipnotizuar. Këto qenë fjalët që hapën portat e ankthit.

Mbi librin

Quhet Erik Maria Bark dhe ishte hipnotizuesi më i famshëm në Suedi. Por më pas gjithçka shkoi tmerrësisht keq dhe jeta e tij qëndronte një hap larg humnerës. Premtoi publikisht të mos e praktikonte më kurrë hipnozën dhe për 10 vjet e mbajti këtë premtim. Deri sot. Sot është 8 dhjetor. Është një natë e zhytur në dëborë dhe tringëllima e telefonit e zgjon menjëherë. Është Joona Lina, komisar i policisë kriminale. Një pacient ka nevojë për të.

Një djalë me emrin Jozef Eku, që sapo ka qenë i pranishëm në masakrën e familjes: mamaja dhe motra e vogël janë therrur me thikë përpara syve të tij dhe ai vetë është gjetur në një lumë gjaku, çuditërisht i gjallë. Jozefi është shtruar në gjendje të rëndë shoku dhe nuk komunikon me botën përreth. Por është dëshmitari i vetëm i ngjarjes dhe duhet pyetur tani, sepse vrasësi kërkon ta përmbushë veprën duke vrarë edhe motrën e madhe të Jozefit.

Ka vetëm një mënyrë për të marrë ndonjë të dhënë: të hipnotizohej Jozefi menjëherë. Ndërsa përshkon me makinë Stokholmin, që nuk kishte qenë kurrë kaq i errët dhe i ngrirë, Eriku e di tashmë që do ta thyejë premtimin e tij, do të pranojë ta hipnotizojë Jozefin. Sepse brenda vetes e di sesa i ka munguar puna e tij. E di që hipnoza funksionon. Ajo që hipnotizuesi nuk e di është se e vërteta që do të vijë prej djalit nën hipnozë do ta ndryshojë përgjithmonë jetën e tij.

Komente mbi librin

"Ngjarja e Hipnotizuesit zhvillohet në Suedi, por personazhet, dilemat dhe rasti i vrasjes makabre janë universale."

The Indipendent

"Lars Kepler magjeps lexuesit me Hipnotizuesin, ashtu si Stieg Larsson me serinë Millenium... Mbetesh pa fjalë dhe përpiqesh të kuptosh se kush është Lars Kepler. Njeriu që me shkopin e tij magjik ka krijuar një prej romaneve më të mira të krimit, i cili të shtyn ta lexosh brenda një nate."

Norrköpings Tidningar