Dymbëdhjetë, Arben Çejku

Titulli: Dymbëdhjetë
Origjinali: Dymbëdhjetë
Gjinia: Roman
Autori:Arben Çejku
Shtëpia botuese: Pegi
Viti: 2013
Fq. 296
Pesha: 0.313 kg
ISBN: 978-9928-162-97-7

Mbi librin

Romani "Dymbëdhjetë" sjell te lexuesi një histori të cilën secilit prej nesh i duket se mund ta "prekë" vetëm me një zgjatje dore, por që njëherësh e ka të pamundur ta besojë. E vërteta është që njerëz të ndryshëm ndërveprojnë në këtë histori nëpërmjet "komunikimit" që kanë bërë me personazhin kryesor, Lek Drini në "Facebook".

Legjenda shqiptare thotë se Konstandini u ngrit nga varri që të përmbushte amanetin e së ëmës për t'i sjellë Doruntinën, kur atë ta merrte malli. Është pikërisht malli ai që nxit vëllain e Lekës për të nisur një aventurë, që për pak do t'i kushtojë shtrenjtë. Ai e "ringjall" Lekën përmes "Facebook"-ut dhe për çdo ditë e ushqen jetën virtuale të vëllait duke gërryer botën reale të vetes dhe të miqve, duke përfshirë edhe familjen e tij.

Sa më i gjallë e i përditshëm bëhet Leka, aq më ndjeshëm transformohet dhe vuan vëllai i tij. Por në lojë tashmë kanë hyrë edhe të tjerë. Vallen e heq Eda, një vajzë e pafajshme dhe bukuroshe, e cila pasi njihet me "princin" e saj, përjeton një sërë të papriturash befasuese.

Fragment nga libri

U ngrit nga vendi dhe shkoi e mori shiritin e buqetës, në të cilën Leka kishte shkruar "Eda, gëzuar ditëlindjen! Edhe 100 vite të bukura dhe fat në dashuri! Leka!" Nisi t'i analizonte fjalë për fjalë këto dy fjali. U ndal dhe veçoi togfjalëshin "fat në dashuri". Pse ai ta kishte përcjellë këtë urim, këtë mesazh?

Mos kjo ishte shenjë se te Leka diçka nuk shkonte dhe urimin e bënte që Eda të kishte fat me dikë tjetër? Apo mos ndoshta kjo ishte parafjala e asaj që Eda priste, shprehjen e dashurisë nga Leka në një moment të shpejtë? Mos ndoshta e gjithë kjo vëmendje ishte e kotë, sepse vetë mesazhi mund të ishte një kopjim nga mijëra urime që gjenden sot në internet?

Mbi autorin

Arben Çejku ka botuar librin e tij të parë poetik "Floknaja e muzgut" në vitin 1996. Nga viti 1992, autori ka punuar në Agjensinë Telegrafike Shqiptare e më pas ka vijuar në disa media dhe përveç artikujve ditorë, ai ka botuar në vitin 2000 librin "Demokracia e imponuar", një ese mbi zhvillimet politike të Shqipërisë moderne.

Në periudhën 1993 – 1995 dhe nga viti 2005 e në vazhdim, z. Çejku u angazhua në diplomaci dhe ka përfaqësuar Shqipërinë në Kosovë e në Maqedoni me detyrën e ambasadorit. Krahas punës së përditshme zyrtare, autori nuk ka hequr dorë nga krijimtaria letrare dhe romani "Dymbëdhjetë" është proza e tij e parë që sheh dritën e botimit. Së shpejti, ai do t;i sjellë lexuesit një përmbledhje të re poetike nga krijimtaria e tij disavjeçare.