Kolonelit s'ka kush t'i shkruaje, Gabriel Garcia Markez

Titulli: Kolonelit s'ka kush t'i shkruajë
Origjinali: El coronel no tiene quien le escriba
Gjinia: Novelë
Autori: Gabriel Garsia Markez
Shqipëroi: Aurel Plasari
Shtëpia botuese: ABC
Viti: 2007
Fq. 76
Pesha: 0.079 kg
ISBN: 978-99943-98-45-4

Fragment nga libri

Koloneli hapi kutinë e kafesë dhe pa se kishte mbetur vetëm një lugëz. Hoqi xhezvenë nga zjarri, derdhi gjysmën e ujit në dyshemenë prej dheu dhe me një thikë kroi kutinë sipër xhezves deri kur ranë dhe grimcat e fundit të kafesë të përziera me leskra ndryshku.

Ndërkohë që priste të bëhej kafeja, i ulur pranë shporetit prej balte të pjekur, me një qëndrim pritje të pafajme e gjithë besim, koloneli pati përshtypjen se në rropulli po i rriteshin kërpudha dhe luleshpata të helmëta. Ishte tetor.

Një mëngjes nga ata të cilëve zor t'u bësh bisht, qoftë edhe për një njeri si koloneli, që kish jetuar kushedi se sa mëngjese të tilla. Për pesëdhjetë e gjashtë vjet me rradhë, qysh kur kish mbaruar lufta e fundit civile, koloneli s'kish bërë gjë tjetër veçse kishte pritur. Dhe një ndër të paktat gjëra që vinin ishte tetori.