Anjeza nuk u zgjua, Preç Zogaj

Titulli: Anjeza nuk u zgjua

Gjinia: Roman

Autori: Preç Zogaj

Shtëpia botuese: UET Press

Viti: 2019

Fq. 494

Pesha: 0.596 kg

ISBN: 978-9928-236-85-2

Mbi librin

E kishte gjetur prapë buzën e dalit të njomur tashmë nga goja e saj, e kishte puthur lehtë dhe ngadalë, e kishte mbajtur gjatë, e kishte lëshuar, e kishte puthur përsëri, më gjatë, më gjatë dhe buzët e Davidit kishin bërë të njëjtën gjë, si një imitim, me buzën e saj të poshtme; kishin shkëmbyer ëmbëlsi, poe edhe dije në anë të pleksjeve plot pasion të buzëve, frymës, gjuhëve, lëngjeve të ëmbla të gojëve: dijen se ishin më të afërt sesa e kishin ditur deri në atë çast, shumë më të afërt, shuuumë më të afërt. 

Ajo e kishte futur thellë gojën e saj në të tijën, e kishte puthur prapë gjatë, ishte lumturuar dhe ai ia kishte kthyer me pikë e me presje. Kjo kishte qenë puthja, që nuk mësohej, që dihej, që jepej e merrej, që fillonte gjithnjë nga fillimi, një herë e parë e përjetshme. Nuk do të ishin ndalur po të mos u duhej të verifikonin çfarë ishte një ngjarje plotësuese apo konkurruese që po zhvillohej në pjesën e poshtme të trupave të tyre, të trupit të tij më shumë, por edhe të trupit të saj, një vibrim, një rrahje e verbër, një vlim, një zgjim mishrash e damarësh që sikur ngriheshin nga hiçi për të marrë komandën e ngjarjes. Ajo ishte shkëputur prej tij, e ndërgjegjësuar  për ereksionin e Davidit, por atij nuk duhej t’I vinte turp, ajo nuk ishte aq naïve sa t’ia merrte për keq që ishte shkëputur.