Procesi i Nurembergut, vellimi i pare

Titulli: Procesi i Nurembergut, vëllimi i parë
Origjinali: Procesi i Nurembergut, vëllimi i parë
Gjinia: Histori
Shqipëroi: Neki Kalaja
Shtëpia botuese: Onufri
Viti: 2005
fq. 560
Pesha: 0.67 kg
ISBN: 978-99927-53-83-8

Mbi librin

Deklaratë mbi përgjegjësinë e hitlerianëve për krimet e kryera Britania e Madhe, Shtetet e Bahkuara dhe Bashkimi Sovjetik kanë marrë dëshmi nga burime të ndryshme mbi krimet, vrasjet dhe dënimet në masë, të kryera ma gjakftohtësi nga forcat e armatosura hitleriane, në vendet e pushtuara prej tyre, prej nga po dëbohen vazhdimisht.

Egërsia e shtypjes hitleriane nuk është një fakt i ri dhe të gjithë popujt, dhe vendet e pushtuara prej tyre, kanë vuajtur nga forma më e keqe e qeverisjes me ndihmën e terrorit. I ri është fakti që në shumë nga këto territore, që po çlirohen nga përparimi i ushtrive të vendeve çlirimtare, hordhitë hitleriane, gjatë tërheqjes së dëshpëruar, i kanë dyfishuar mizoritë e tyre të pamëshirshme. Për egërsinë e tyre të padëgjuar, tani dëshmojnë faktet e krimeve të përbindshme, të kryera në territoret e çliruara të Bashkimit Sovjetik, si dhe në territoret e Francës dhe Italisë.

Në lidhje me sa u përmend më lart, tri qeveritë aleate, duke u shprehur në interest të 32 shteteve anëtare të Kombeve të Bashkuara, deklarojnë dhe paralajmërojnë me solemnitet sa vijon: Në çastin e arritjes së çfarëdo armëpushimi nga çdo qeveri që mund të krijohet në Gjermani, ata oficerë gjermanë, ushtarë dhe anëtarë të Partisë Naziste, të cilët kanë qenë përgjegjës për egërsitë, vrasjet dhe dënimet që u përmendën më lart, dhe i kanë kryer ato me vetëdashje, do të dërgohen në ato vende ku kanë kryer aktet e tyre të neveritshme, me qëllim që të gjykohen e të ndëshkohën në përputhje me ligjet e këtyre vendeve të çliruara dhe nga qeveritë e lira që do të krijojnë ato.

Listat do të hartohen me të gjitha hollësitë e mundshme, do të merren nga ato vende, veçanërisht tokat e pushtuara në Bashkimin Sovjetik, Poloni dhe Çekosllovaki, Jugosllavi dhe Greqi duke përfshirë Kretën dhe ishuj të tjerë, Norvegji, Danimarkë, Vendet e Ulëta, Francë dhe Itali. Në këtë mënyrë, gjermanët që kanë marrë pjesë në pushkatimet në masë të oficerëve italianë, ose në dënimet e njerëzve të marrë peng nga Franca, Holanda, Belgjika dhe Norvegjia, ose të fshatarëve të Kretës, ose ata që kanë marrë pjesë në masakrat kundër popullit polak, ose në atë të popullsisë së territoreve të Bashkimit Sovjetik, të cilat tani po spastrohen nga armiku, duhet ta dinë se do të kthehen mbrapsht, në vendet e krimeve të tyre dhe do të gjykohen në vend nga popujt, kundër të cilëve kanë kryer akte dhune.

Ata që deri tani ende nuk kanë lyer duart me gjak të pafajshëm, le të kenë parasysh këtë, dhe të mos futen në radhët e fajtorëve, sepse tri qeveritë aleate do t'i gjejnë me çdo kusht, edhe në fund të botës qofshin, dhe do t'i dorëzojnë në duart e akuzuesve të tyre, në mënyrë që të marrin dënimin e drejtësisë. Kjo deklaratë nuk prek çështjen e kriminelëve kryesorë, fajet e të cilëve nuk janë lidhur më një vend të caktuar, të cilët do të ndëshkohen me një vendim të përbashkët të qeverive aleate. Ruzvelt, Stalin, Çërçill Nënshkrimi i aktit të kapitullimit pa kushte të Forcave të Armatosura Gjermane.

1. Ne, të nënshkruarit, duke vepruar në emër të Komandës së Lartë Gjermane, pranojmë kapitullimin pa kushte të të gjithë forcave tona të armatosura në tokë, në det e në ajër, si dhe të të gjitha forcave që në këtë çast ndodhen nën komandës gjermane, Komandën e Lartë Ushtrisë së Kuqe e njëkohësisht të Komandës së Lartë të Forcave Pushtuese Aleate.

2. Komanda e Lartë Gjermane do t'u japë menjëherë urdhër të gjithë komandantëve gjermanë të forcave tokësore, detare e ajrore që janë nën komandën e saj, të ndërpresin veprimet luftarake në orën 23.01 sipas kohës së Europës Qendrore, të datës 8 maj 1945, të qëndrojnë në vendet e tyre, aty ku do të ndodhen këtë çast dhe të çarmatosen plotësisht, duke ua dorëzuar armët e tyre dhe materialet e luftës komandave të vendit aleat ose oficerëve të caktuar nga përfaqësuesit e Komandës së Lartë të Aleatëve, duke mos prishur e duke mos u shkaktuar asnjë dëm anijeve, avionëve, motorëve të tyre, korpuseve dhe pajisjeve, gjithashtu makinave, aparateve dhe përgjithësisht teknikës dhe mjeteve të tjera të luftës.

3. Komanda e Lartë Gjermane do të caktojë menjëherë komandantët përkatës dhe do të sigurojë zbatimin e të gjitha urdhërave të tjera që do të shpallë Kryekomanda e Lartë e Ushtrisë së Kuqe dhe Komanda e Lartë e Forcave Pushtuese Aleate.

4. Ky akt nuk do të përbëjë pengesë për zëvendësimin e tij më ndonjë akt tjetër të përgjithshëm për kapitullimin, të përfunduar nga Kombet e Bashkuara ose në emër të tyre, për Gjermaninë dhe pëgjithësisht për forcat e armatosura gjermane.

5. Në rast se Komanda e Lartë Gjermane ose çfarëdo force tjetër e armatosur, që gjendet nën urdhrat e saj, nuk do të veprojë në përputhje me këtë akt kapitullimi, Komanda e Lartë e Ushtrisë së Kuqe si dhe Komanda e Lartë e Forcave Pushtuese Aleate do të ndërmarrin masa ndëshkuese ose masa të tjera që ata do t'i quajnë të domosdoshme.

6. Ky akt është hartuar në rusisht, anglisht dhe gjermanisht. Vetëm tekstet rusisht dhe anglisht janë autentike Nënshkruar më 8 maj 1945, në Berlin.