Perrallat e tranzicionit shqiptar, Shinasi A. Rama

Titulli: Përrallat e tranzicionit shqiptar
Origjinali: Përrallat e tranzicionit shqiptar
Gjinia: Histori, shkenca sociale
Autori: Shinasi A. Rama
Shtëpia botuese: Princi
Viti: 2012
Fq. 502
Pesha: 0.619 kg.
ISBN: 978-9928-4090-2-7

Fragmente nga libri

Vendosja e një demokracie liberale, si objektiv dhe si proces, duket një objektiv më i largët sot se sa ka qenë në vitin 1990... ... Çdo dështim i sistemit është i lidhur pazgjidhshmërisht me parinë dhe me rolin e saj. ... Po kush është paria?

Paria janë ata individë, që të organizuar në grupe dhe interesa ideologjike të përbashkëta, luajnë një rol parësor, vendimtar, dhe sistematik në marrjen e vendimeve lidhur me organizimin shoqëror, si dhe në përcaktimin e politikave dhe vlerave të shoqërisë në një shtet të caktuar. Paria janë pakica e organizuar dhe sunduese. Por, ka një dallim të madh cilësor midis parisë, klasës politike, shtresës sunduese dhe elitës...

... Paria ka synuar që të vendosë sistemin që i shërben më mirë ruajtjes së interesave të saj. Prandaj edhe demokracia shqiptare lindi e dështuar. Sot e ardhmja e saj është, në dukje, si e shkuara, krejt e pashpresë. Mirëpo edhe kur u krijuan kushtet për vendosjen e një demokracie funksionale në vitin 2005, pas përvojave traumatike të përjetuara gjatë 20 viteve të kaluara, e në veçanti mbas ngjarjeve tragjike të vitit 1997, proceset po vazhdojnë që të ecin në të njëjtën hulli.

... Shteti është i kapur nga një grup i vogël klanesh të parisë që kanë mbledhur e përvetësuar pasurinë kombëtare dhe që vjedhin sistematikisht nga thesari i shtetit. Paria ndjek synimet e veta duke iu kundërvënë, në çdo hap, forcimit të shtetit, të sistemit demokratik, dhe është në luftë të hapur me popullin e vet.

Jo vetëm që shteti nuk ka sovranitet, por institucionet shtetërore janë të kapura nga krimi, të vëna haptazi në sherbim të strukturave kriminale, dhe paria sunduese është bashkëpunuese e strukturave kriminale dhe në krye të tyre. Makina oligarkike parisë është tejet efektive dhe bllokon çdo inisiativë për ndryshim. Kontrolli mbi shtetin ushtrohet nga strukturat politike të parisë që e kanë feudalizuar shtetin dhe punojnë në bazë të përqindjeve.

Gjithkund paritë mundohen të punojnë prapa skenës. Prandaj paritë akuzohen si shtresa konspirative. Në rastin shqiptar, paria i bën të gjitha hapur dhe sheshit. Si grindjet, ashtu edhe marrëveshjet midis palëve të parisë janë lehtësisht të lexueshme nga çdokush. Zhveshja e parisë nga vlerat morale ka arritur në ekstrem...

Komente mbi librin

"Shinasi Rama ka kaluar në zhgënjime të mëdha, por ai kurrë nuk është zhgënjyer me popullin e vet."

Adem Demaçi

"Rrallë më ka ndodhur të bie në mendime, siç rashë pasi lexova dhe rilexova "Përrallat e tranzicionit shqiptar"... Me një mprehtësi dhe tejpashmëri të lavdërueshme të dukurive tona, edhe pse nuk jeton këtu, Shinasi Rama, përshkruan cilësitë dhe veçoritë e "parisë së Tiranës", përkatësisht të klasës së sotme politike, duke vënë syrin dhe fjalën e tij mbi plagët dhe mbi hallet tona."

Kiço Blushi

Mbi auorin

Shinasi Rama ka lindur në Shkodër më 1959, ka magjistruar në South Carolina University (1992 – 1996), mban gradën Doktor i Shkencave Politike nga Columbia University (1996 – 2004) dhe është Profesor Klinik në Departamentin e Politikës në New York University në SHBA. Është Drejtor i Programeve të Masterit në Departamentin e Politikës të NYU dhe Zv. Drejtor i Qendrës Alexander Hamilton për Ekonominë Politike. Jep mësim në nivelin pasuniversitar në NYU dhe në Columbia University.

Ai ka qenë edhe Organizues dhe Drejtues i Lëvizjes Studentore të viteve 1990 – 1991, bashkëthemelues i Partisë Demokratike, Anëtar i Komisionit Nismëtar i PD – së. Gjatë Luftës së Kosovës ka qenë Zëdhënës i UÇK – së në SHBA, Këshilltar Politik i Delegacionit Shqiptar në Rambuje dhe Këshilltar i Lartë Politik i Kryeministrit të Qeverisë së Përkohshme të Kosovës.