Bota e djeshme, Stefan Zweig

Titulli: Bota e djeshme, kujtime të një europiani
Origjinali: Die Welt von Gestern
Gjinia: Autobiografi
Autori: Stefan Zweig
Shqipëroi: Aristidh Ristani
Shtëpia botuese: Santori
Viti: 2012
Fq. 444
Pesha: 0.571 kg.
ISBN: 978-9928-4116-0-0

Mbi librin

Bota e djeshme janë Vjena dhe Europa e 1914 – s, ku Stefan Cvajgu u rrit dhe pati sukseset e para si shkrimtar, ku lexoi me pasion, shkroi dhe udhëtoi, lidhi miqësi me Frojdin, Rilken dhe Valerinë... Një botë e stabilizuar ku, me gjithë tensionet nacionaliste, liria e mendimit gëzonte gjithë të drejtat.

Kjo e kaluar shihet me mall, sepse shkrimtari i mërguar që shkruan "Kujtimet e një europiani" ka parë rrënimin e tmerrshëm të 1914 –s, shembjen e froneve, përmbysjen e ideve, pastaj shpartallimin e mbarë një qytetërimi nën dyndjen e pandalshme të nazizmit...

Kjo tablo e një gjysmë shekulli historie të Europës, plot me anekdota, ngjyra e fakte interesante, por edhe plot me ngjarje dramatike, përmbledh kuptimin e një jete, të angazhimit të shkrimtarit, të një ideali. Është gjithashtu një libër – dëshmi nga më tronditësit, më të thellët, më instruktivët e më aktualët, i cili na ndihmon të kuptojmë shekullin që kaloi.

Fragment nga libri

Përmes jetës sime janë turrur tërë kuajt e murrëtyer të apokalipsit: revolucion dhe zi buke, zhvlerësim paraje dhe terror, epidemi dhe emigracion; kam parë të rriten e të përhapen mu para syve të mi ideologjitë e mëdha masive, fashizmin në Itali, nacionalsocializmin, që ka helmuar lulen e kulturës sonë evropiane...

Por, deri edhe nga thellësitë e humnerës së terrorit ku po endemi sot gjysmë të verbër, me shpirt të trazuar e të këputur, ngre sytë e vështroj pareshtur ato yjësi të lashta që më patën ndriçuar rrugën e fëmijërisë dhe ngushëllohem me besimin që kam trashëguar nga të parët e mi se një ditë ky kthim prapa do të ngjajë vetëm si një interval në ritmin e përjetshëm të ecjes së pandalshme përpara.

Mbi autorin

Stefan Cvajgu lindi në Vjenë më 1881. Ka shkruar në gjini letrare nga më të ndryshmet: poezi, novela, romane, drama, biografi të letrarizuara dhe kritikë letrare. Ato që e bënë të famshëm në mbarë botën qenë novelat. I tronditur thellë nga ardhja e nazizmit në fuqi dhe nga mizoritë e tij të shumta e të pashembullta, Stefan Cvajgu emigroi në Brazil. I dha fund jetës, bashkë me gruan e tij të dytë, në Petropolis më 22 shkurt 1942.