Profile të diplomacisë europiane në Ballkan, Shaban Murati

Titulli: Profile të diplomacisë europiane në Ballkan
Origjinali: Profile të diplomacisë europiane në Ballkan
Gjinia: Histori
Autori: Shaban Murati
Shtëpia botuese: UET Press
Viti: 2009
Fq. 292
Pesha: 0.301 kg
ISBN: 978-99956-39-19-8

Koment nga Ksenofon Krisafi

Shaban Murati, i afirmuar si një nga diplomatët tanë më me përvojë dhe një nga ekspertët më të mirë të problemeve ndërkombëtare e sidomos të Ballkanit, veçanërisht si njohës i spikatur i skenarëve të zhvillimeve ballkanike të Serbisë në këto kohë turbulencash politike, si autor hulumtues i enigmave diplomatike të pavarësisë së Kosovës, vjen para lexuesit me librin "Profile të diplomacisë europiane në Ballkan".

Ndryshe nga dy librat e mëparshëm, ky që kemi sot në duar, edhe pse përqendrohet sërish në tematikën e tij të preferuar, Serbia, Kosova, Ballkani, është zgjeruar edhe me subjekte të tjera, gjithaq interesante, si vendi dhe roli i Shqipërisë dhe i Kosovës në këtë skakierë zhvillimesh, BE – ja, vende të veçanta anëtare të saj, SHBA – ja, Rusia, vendet islamike, Kina dhe shumë të tjera.

Që në shfletimin e parë dallohen lehtë se spektri i vështrimit është i gjerë dhe megjithatë i përcaktuar. Autori e ka drejtuar shikimin e vet në skaje diametrale të hapësirës politike evropiane e botërore, nga Kina e largët te SHBA – ja, Rusia, te vendet islamike, nga vendet afrikane dhe latino – amerikane drejt qendrës së Europës, për t'u ndalur te Gadishulli i trazuar Ballkanik.

Në të gjitha këto pika ai gjen elemente, faktorë veprues a ndikues në zhvillimet ballkanike, por sidomos në qëndrimet kapricioze e tekanjoze të Serbisë së sotme. Dhe gjithçka, në fund të fundit, ai e fokuson tek interferencat e tyre në të ardhmen e Kosovës dhe në konfigurimet e rikonfigurimet e mozaikut të brishtë e kaotik ballkanik.