Tre libra të George Orwell

I varfër dhe i pastrehë në Paris dhe Londër

Në vitin 1928, 25 vjeçari Eric Arthur Blair vendoset në Paris, kryeqyteti i kulturës botërore dhe destinacioni i shumë shkrimtarëve dhe artistëve, të pasur dhe të varfër, nga e gjithë bota. Një incident i pakëndshëm i ndodh shkrimtarit të ri, që e zhyt në mjerim, në uri dhe në kërkim të punëve të rëndomta. Shkrimtari, që më vonë u bë i njohur me pseudonimin George Orwell, nisi në këtë mënyrë të eksploronte Parisin dhe, më pas Londrën, nga statusi i “skllavit të skllavit” dhe prej syve të endacakut.

I botuar fillimisht në vitin 1933, I varfër dhe i pastrehë në Paris dhe Londër u bë një udhërrëfyes klasik i dy metropoleve të mëdhenj dhe një analizë e mprehtë sociale e politike e viteve ’30. Ky është libri që besohet se caktoi edhe pikën e kthesës së Orwellit, nga fëmija e një familjeje me mirëqenie dhe i arsimuar në shkollën e elitës Eton, në luftëtar për një shoqëri të drejtë dhe të barabartë.

Ferma e Kafshëve

Përralla e famshme e George Orwell dhe portretizimi satirik i politikës, e bëri autorin një figurë të urryer për komunistët europianë, por ndihmoi, gjithashtu, të gjithë qytetarët që kërkojnë drejtësi dhe barazi, të kuptojnë rreziqet që mbartin revolucionet e shkuara keq.

“Një libër shumë i keq, por shumë i mençur”, e cilësoi Simone de Beauvoir, ndërsa CIA, fshehurazi, sponsorizoi prodhimin dhe shpërndarjen e një filmi vizatimor të mbështetur te ky roman, si përpjekje subversive kundër bllokut komunist.

Që kur u botua për herë të parë në vitin 1945, Ferma e Kafshëve vijon të kënaqë lexuesit e të gjitha moshave me humorin e hidhur dhe talljen shpartalluese të pushtetit, duke i garantuar Orwell-it pozicionin e një prej shkrimtarëve më të mëdhenj të shekullit të njëzetë.

1984

Diku, në një zyrë në Departamentin e Arkivit, në ndërtesën e stërmadhe të Ministrisë së të Vërtetës, Uinston Smithi është zoti në punën e tij; ai rishkruan të shkuarën në shërbim të Partisë, falsifikon statistika apo fshin emrat e të padëshirueshmëve nga arkivi. Megjithatë, ai është rebel nga brenda, kundërshtar i botës totalitare në të cilën jeton, një vend ku anëtarët e Partisë kontrollohen përmes sistemeve më të avancuara të teknologjisë së mbikëqyrjes dhe përgjimit, ndërsa populli ushqehet me një bollëk lajmesh banale, futboll dhe lotari, si dhe një dozë patriotizmi primitiv, herë pas here, me një luftë që nuk mbaron kurrë në sfond. Ndërsa kërkon lirinë, ai rebelohet duke hyrë në një histori dashurie sekrete me Julian, një anëtare tjetër e Partisë para se të zbulojë se çmimi i vërtetë për lirinë është tradhtia.