Title: Shqipëria, 1911 – 1914
Original: Shqipëria, 1911 – 1914
Category: History
Author: Romeo Gurakuqi
Publisher: UET Press
Year: 2010
Pgs. 882
Weight: 0.701 kg
ISBN: 978-99956-39-65-5
Mbi librin
Libri i Romeo Gurakuqit është një monografi studimore kushtuar historisë politike e sociale në Shqipëri dhe e marrëdhënieve ndërkombëtare për Ballkanin dhe Shqipërinë, nga fillimi i Revolucionit Nacional Shqiptar deri në pragun e shpërthimit të Luftës së Parë Botërore. Kjo monografi është e ndarë në dy pjesë kryesore: Kryengritja Shqiptare e vitit 1911 dhe Pavarësia shqiptare; dhe çështja e caktimit të kufijve të shtetit të ri shqiptar 1912-1914.
Kryengritja e Malësisë së Madhe e vitit 1911, e njohur ndryshe si Kryengritja Shqiptare e vitit 1911, është një nga momentet kryesore të periudhës së Rilindjes Kombëtare Shqiptare. Monografia vijon me historinë politike të Shqipërisë së Epërme, të Kosovës, Shqipërisë Qendrore dhe Jugore, në rrjedhën pas kryengritjes së vitit 1911 dhe gjithë vitin 1912.
Kapitujt kryesorë të pjesës së dytë i kushtohen trajtimit të çështjes shqiptare nga diplomacia e Fuqive të Mëdha gjatë krizës ballkanike 1912-1914. Historiani Romeo Gurakuqi ka punuar 17 vite mbi këtë libër, një punë që e sjell si një vlerë më shumë në kolanën e botimeve historike pikërisht në këtë përvjetor të rëndësishëm të shtetit shqiptar.
Sipas akademikut Ksenofon Kristafi, libri "Shqipëria 1911-1914", e historianit Romeo Gurakuqi, merr në studim tre vjet jo të zakonshëm për Shqipërinë, vite që ai i cilëson si ngjarje të bujshme që përmbysën një epokë të kombit shqiptar të nëpërkëmbur e të shpërndarë të katër vilajete.
Koment nga autori
Libri që ju paraqis është përpjekje e imja për të pasqyruar në mënyrë të hollësishme këtë periudhë të Shqipërisë nga fundi i vitit 1910 deri në fund të 1914-s, ishte kohë kur hidheshin themelet e Shqipërisë moderne, të shtetit, janë vitet kur Shqipëria shkëputej nga perandoria dhe përpiqej të formonte oborrin e shtëpisë së vet, por që në këtë rrugë do të pengohej për një seri arsyesh të brendshme dhe të jashtme.
Një përpjekje për të ndriçuar atë trashëgimi që shqiptarët e lirisë e nisën në Deçiq, e vazhduan në Gjakovë, Korçë, Mashkullorë, e më pas u vazhdua nga një senator, nga disa profesorë, dy klerikë të shquar dhe shumë shqiptarë që e ndoqën pas nga Nisa në Stamboll, Bukuresht, Trieste në Durrës, për të përfunduar në Vlorë më 28 nëntor 1912. Ky libër nuk do të kurorëzoj sot nëse nuk do të kishte kushte materiale për kërkim akademik, ndaj merita kryesore është e ekipit drejtues të UET-it, që krijoi frymën për të marrë produktin.
Koment nga Ksenofon Kristafi
1911-1914 janë tre vjet që kurorëzuan shekuj luftërash dhe inauguruan fillimin e një epoke tjetër, të krijimit të Shqipërisë së pavarur. Përmes shqyrtimit të kujdesshëm dhe tërësor të dokumenteve të arkivave të kancelarive më të mëdha europiane dhe shqiptare. Një strukturë solide me informacion të bollshëm, të freskët dhe të pa shfrytëzuar.
Një punë me pasion shumëvjeçar. I parë me një këndvështrim objektiv dhe të paanshëm. Libri është një minierë ku gjenden fakte, të dhëna, analiza dhe konkluzione për shumë ngjarje. Sjell një kontribut në shkrimin e historisë së kësaj periudhe, që edhe pse janë ndriçuar nga autorët të tjerë mbeten vendimtare dhe interesante për studiuesit.
