Miti i karizmes, Olivia Fox Cabane

Titulli: Miti i karizmës (kopertina e trashë)
Origjinali: The Charisma Myth
Gjinia: Psikologji
Autori: Olivia Fox Cabane
Shqipëroi: David Hudhri
Shtëpia botuese: Minerva
Viti: 2016
Fq. 288
Pesha: 0.593 kg.
ISBN: 978-9928-4227-4-3

Mbi librin

Po sikur karizma të mund të mësohej? Miti i karizmës është ideja se karizma është një cilësi thelbësore e lindur – ose e keni (Bill Clinton, Steve Jobs, Oprah) ose jo. Por, siç Olivia Fox Cabane zbulon, kjo nuk është aspak e vërtetë. Sjelljet karizmatike mund të mësohen dhe përsosen nga kushdo.

Duke marrë nga teknikat të cilat fillimisht i krijoi për Harvardin dhe MIT, Cabane e ndan karizmën në përbërësit e saj. Që të bëheni më karizmatik, nuk do të thotë të ndryshoni personalitetin tuaj.

Por, ka të bëjë me përshtatjen e një serie praktikash të caktuara, të cilat shkojnë me personalitetin që keni. Miti i karizmës ju tregon si të jeni më ndikues, më bindës dhe më frymëzues.

Fragment nga libri

Marilyn Monroe donte të vërtetonte diçka. Ishte një nga ditët me diell të verës së vitit 1955, në qytetin e New York-ut. E shoqëruar nga një redaktor reviste dhe fotografi i saj personal, Marilyn po ecte përgjatë Grand Central Terminal.

Megjithëse kulmi i një dite pune dhe platforma gumëzhinte nga turma e njerëzve, askush nuk e vuri re, teksa ajo priste trenin elektrik. Pasi aparati fotografik u shkrep, ajo hyri në kabinë dhe qetësisht zuri vend në një kënd. Askush nuk e njohu.

Marilyn donte të demonstronte se, vetëm po të vendoste ajo, mund të shndërrohej në magjepsësja Marilyn Monroe apo e zakonshmja Norma Jean Baker. Në metro, ajo ishte Norma Jean. Por kur u ngjit në trotuarët e zhurmshëm të New York-ut, ajo vendosi të shndërrohej përsëri në Marilyn.

Vështroi rreth e rrotull dhe e ngacmoi fotografin e saj: "A do ta shohësh atë?" Dhe nuk bëri ndonjë gjest kushedi – vetëm sa "gufoi flokët dhe mori pozën e saj." Me këtë ndryshim të thjeshtë, befas, si magnet, ajo tërhoqi njerëzit që e rrethonin. Sikur një aurë magjike rridhte prej saj dhe gjithçka përreth ngriu.

Koha po ashtu ndaloi, sikundër njerëzit rrotull saj, të cilët u shtangën të mahnitur, kur befas njohën midis tyre yllin e kinemasë. Në çast adhuruesit u derdhën drejt Marilyn-it, dhe "u deshën disa minuta shtytje dhe frike" që fotografi ta ndihmonte t'i largohej turmës që shtohej.
Karizma ka qenë gjithmonë një temë intriguese dhe e diskutueshme.

Kur u tregoj njerëzve, në konferenca apo festa, se unë "u mësoj karizmën të tjerëve", ata menjëherë gjallërohen dhe shpeshherë, me zë të lartë, thonë: "Por unë kam menduar se karizma, është diçka e tillë të cilën ti e ke ose jo." Disa e shohin si një avantazh të padrejtë, të tjerë janë të etur për ta mësuar, por të gjithë mahniten. Dhe me të drejtë. Njerëzit karizmatikë kanë ndikim në botë, qoftë kur nisin projekte, kompani apo perandori të reja.

E keni pyetur ndonjëherë veten si do të ndiheshit po të ishit aq tërheqës sa Bill Clinton apo magjepsës sa ç'ishte Steve Jobs? Nëse mendoni se jeni pak karizmatik dhe doni ta ngrini në një nivel më të lartë? Apo nëse keni dëshiruar në fshehtësi të kishit pak nga kjo cilësi por mendoni se nuk i përkisni tipave karizmatikë? Atëherë, kam lajme të mira për ju: karizma është një aftësi që mund ta mësoni dhe ta përvetësoni me praktikë.

Në verën përvëluese të Londrës së vitit 1886, William Gladstone garonte kundër Benjamin Disraelit për vendin e kryeministrit të Mbretërisë së Bashkuar. Ishte Epoka Viktoriane dhe fituesi do të sundonte gjysmën e botës.

Në javën e fundit para zgjedhjeve, të dy këta burra rastisën të ftonin për darkë të njëjtën grua të re. Siç pritej, shtypi e pyeti këtë grua se çfarë përshtypje i kishin lënë të dy kundërshtarët.

Ja si u përgjigj, "Pasi darkova me Z. Gladstone, mendova se ai ishte personi më i zgjuar në Angli. Por, pasi darkova me Z. Disrael, mendova se isha unë personi më i zgjuar në Angli." E gjeni se kush i fitoi zgjedhjet? Ishte që i bënte të tjerët të ndiheshin të zgjuar, mbresëlënës dhe mahnitës: Benjamin Disraeli.

Komente mbi librin

"Cabane u ofron këshilla të zbatueshme dhe një guidë praktike liderëve që duan të përmirësohen, pa kompromentuar integritetin apo autoritetin."

Laura Tang, CEO, Time Inc.

"Cabane na ka bërë një nder të madh. Ajo ka ndërthurur shkencën e palëkundshme me rrëfimin përfshirës duke sjellë një trajtim udhëzues, të rolit të karizmës në lidership – një temë të cilën (deri tani) e kuptonim shumë pak."

Robert B. Cialdini, autor i librit "Influence"

""Miti i karizmës" është i lehtë për t'u lexuar. Ai bashkon historitë dhe studimet, strategjitë dhe zbatimet, teknikat dhe praktikat."

New York Journal of Books