Princi i buzëqeshjes, Zija Çela

Titulli: Princi i buzëqeshjes
Origjinali: Princi i buzëqeshjes
Gjinia: Tregime
Autori: Zija Çela
Shtëpia botuese: Toena
Viti: 2016
Fq. 288
Pesha: 0.301 kg.
ISBN: 978-9928-205-35-3

Koment nga Rudolf Marku

Lexuesi nuk e ka të vështirë të kujtohet posaçërisht për tre libra të letërsisë botërore, të cilët na vijnë ndër mend si librat më fatlumë: "Princi i lumtur" i Oskar Uajlldit, "Princi i vogël" i Ekzyperisë, "Princi dhe i Varfri" i Mark Tuenit. Janë libra që kanë bashkuar statusin mbretëror të rangut Princ me statusin mbretëror të mjeshtërisë së lartë të tre autorëve.

Letërsia shqipe guxon të shtojë dhe një Princ të katërt, "Princin e buzëqeshjes" të Zija Çelës. Një libër që sjell tregime të mrekullueshme, nota të reja që janë tjetërsoj, që kanë ndjeshmëri, butësi, imagjinatë, poezi, stil përrallor, të përcaktuara nga adresimi (i përfytyruar) i autorit ndaj një lexuesi adoleshent. Mirëpo, në të vërtetë, këto tregime janë të llojit të letërsisë fatlume që lexohet në çdo moshë, duke përballuar edhe lexuesin e ditur, të rrahur me vaj e uthull me letërsinë e mirë.

Princi i Zija Çelës vjen si një Princ i vërtetë: me klasin estetik, me hijeshinë stilistikore, me larminë dhe ngjyrat e titujve, me premtimin se ka ardhur i vendosur të trashëgojë legjitimitetin e kurorës së Princave të mëdhenj paraardhës të mbretërisë së letërsisë.