Klubi Karavasta, Maks Velo

Titulli: Klubi Karavasta
Origjinali: Klubi Karavasta
Gjinia: Novelë
Autori: Maks Velo
Shtëpia botuese: Toena
Viti: 2014
Fq. 72
Pesha: 0.111 kg.
ISBN: 978-99943-1-4245-5-6

Fragment nga libri

Ishte e vështirë të përcaktoje se çfarë ishte. Nuk mund ta quaje as fshat, as qytezë. E quanin fermë, po as fermë tamam nuk ishte, më shumë ishte një pjesë ferme, domethënë vetëm pallatet e fermës; vetëm pallatet, kurse drejtoria, shkolla, infermieria ishin më vete diku nga fusha.

Ishte një bllok banesash, gjithsej dymbëdhjetë pallate trekatëshe të ngritura në mes të fushës. Kishte dhe dy dyqane të ndërtuara më vonë, njëri ushqimor dhe tjetri me artikuj industrialë. Në mes të hapësirës si për t'i lidhur ishte formuar një lulishte e rrumbullakët. Lulishtja ndahej nga pjesa tjetër vetëm nga një bordurë betoni, se asnjëherë kurrkush nuk kishte mbjellë bar apo lule.

Vetëm dy ditë para inaugurimit, para tridhjetepesë vjetësh ishin mbjellë dy plepa dhe katër shelgje lotues. Bari rritej vetë dhe vetëm gjashtë pemët dhe bari i egër përbënin tërë inventarin e lulishtes. Anës kishin vënë katër stola betoni. Po të mendoheshe përse i quanin pallate këto banesa të mjera nuk mund t'i jepje përgjigje. Me siguri ky epitet kishte mbetur që pas dyzetepesës kur u ndërtuan në kryeqytet katër banesa dykatëshe me qerpiç.

Mbi autorin

Maks Velo lindi në Paris, më 31 gusht 1935. Pas lindjes së tij, familja Velo u kthye përsëri në Shqipëri, në qytetin e Korçës, ku Maksi kaloi fëmijërinë. Pasi mbaroi gjimnazin, vazhdoi studimet pranë Institutit Politeknik, në degën e inxhinierisë së ndërtimit. Më pas u specializua për arkitekturë dhe në vitin 1960 mori pjesë në projektimin e parë që u bë në Tiranë. Vite më vonë punoi pranë byrosë së projektimit të Tiranës.

Vitet '78-'79 përkojnë me periudhën më të vështirë të jetës së tij, kohë kur u arrestua dhe u dënua me dhjetë vjet burg. Maks Velo është autor i një sërë botimesh, si: "Kokëqethja", "Palltoja e burgut", "Thesi i burgut", "Paralele për arkitekturën", "Kohë antishenjë", "Jeta ime në figura" etj. Është një ndër figurat më të kompletuara si artist, pasi krijon në disa gjini të artit: pikturë, prozë, poezi, publicistikë, sikundër është i angazhuar në çështje të aktualitetit shqiptar.