Pune spiunesh, Xhovani Shyti

Titulli: Punë spiunësh
Origjinali: Punë spiunësh
Gjinia: Tregime, novela
Autori: Xhovani Shyti
Shtëpia botuese: Belina H
Viti: 2012
Fq. 176
Pesha: 0.22 kg
ISBN: 978-9928-4071-5-3

Mbi librin

Historia është një përrallë e treguar bukur nga fitimtari ka thënë dikur Napoleon Bonaparti, duke dashur të spikasë faktin se atë e shkruan gjithmonë ai që ka fituar betejën e pushtetit, me synimin që nëpërmjet saj kërkon vetëm një gjë: të injorojë, me domosdo, të mundurin. Përkundrazi, krejt tjetër qëndron puna me krijimtarinë letraro – artistike, që është si një ngjalë, të cilën sado të përpiqesh ta shtrëngosh midis grushteve do ta gjej mënyrën të rrëshqasë. Fragmente nga libri Isha shpallur armik Përmbajtja e letrës më zhyti më thellë në honin e dëshpërimit, nga që nxori hapur gjithësa kisha analizuar dhe gjykuar deri atëherë me veten time, e që lidhej me rekrutimin e Avniut nga shërbimi i fshehtë. E megjithatë nuk ishte kjo arsyeja që u ndjeva i hidhëruar aq tepër, por lehtësia me të cilën xhelatët tanë na kompromentonin. Lehtësia me të cilën këta xhelatë i prisnin pjesët e gjymtyrëve tona, lehtësia me të cilën i përvetësonin, i tjetërsonin dhe i hidhnin kundër nesh.

Vrasje në kohë të trazuar

Duhet të kemi kujdes nga fëmijët e tyre... Ata që do të pretendojnë të kundërshtojnë apo do të këmbëngulin, do të lëndohen e do të ndëshkohen – më erdhën nëpërmend fjalët e Udhëheqësit Hije dhe u drodha. Vështrova tim nip. Pata frikë, pasi në objektivat e kamerave dhe në celuloidët e aparateve të tyre fotografike ai ishte fiksuar si hedhësi i lakut në fytin e bronxtë të Enver Hoxhës. Duhet të gjej një bazë për të fshehur djemtë, thashë dhe u çova. Sa më shpejt aq më mirë, - shtova më tej.

Punë spiunësh

Udhëheqësi Hije i vështronte dhe, më tepër se kurrë, i gëzohej aplikimit të platformës xherxhinskiane, që kishte në themel të shërbimit të fshehtë bashkëpunëtorët dhe spiunët vullnetarë. 400 mijë vullnetarë dhe vetëm 1300 zyrtarë të paguar për të krijuar rrjetet e merimangave, që mbanin zap gjithë jetën e vendit. Nuk kishte patur ndonjëherë simpati për rusin Feliks Xherxhinski dhe teorinë e tij: "Sa më shumë spiunë vullnetarë, aq më i fortë është komunizmi", mirëpo e ndjente se e paskësh patur gabim. Se ai paskësh qenë largpamës dhe arkitektura e krijimit të shtetit të tij të spiunëve paskësh qenë një mrekulli e së ardhmes... Nemërçka, Pashtriku, Shishja e Qumështit, Malësori, Hutini, Diplomati, Çiftelia, Llulla, Tigri, Rrezja e Diellit, Korani i Myzeqesë, Bozhuri, Poeti, Holta, Dragoi, Masoviku, Ushtari, Dizenjatori, Corogjafi... Udhëheqësi Hije e hidhte vështrimin sa mbi njërën fytyrë tek tjetra, duke ndjerë t'i shfaqej, menjëherë, edhe emërdosja e gjithkujt prej atyre që në ato çaste gjendej përballë tij.

Mbi autorin

Xhovani Shyti është lauruar për Gjuhë – Letërsi. I përket brezit të gazetarëve të pasviteve '90. Ka shërbyer si reporter, redaktor përgjegjës, zv/kryeredaktor, kryeredaktor dhe drejtor në gazetat "Ideja kombëtare", "Koha Jonë", "Sot", "Letra Publike", "Tema" dhe "Kosova Sot". Është anëtar i Bordit Drejtues të Unionit të Gazetarëve Profesionistë të Shqipërisë dhe i Federatës Ndërkombëtare të Gazetarëve (IFJ) me qendër në Bruksel. Pas librave "Vota të lira, vota të vjedhura", "Ditët e frikshme të vitit '97", pjesë e ciklit "Ditari i Gazetarit" dhe vëllimit me tregime satiro – humoristike "Qentë bastardë", vjen me librin e tij të ri "Punë spiunësh" që merr përsipër të trajtojë me guxim e realizëm tema madhore nga periudha e paskomunizmit që për autorin konsiderohet si koha e spiunëve.