Titulli: Qerbelaja
Origjinali: Kerbala
Gjinia: Roman
Autori: Jacques Charmelot
Shqipëroi: Sonila Kapo
Shtëpia botuese: Toena
Viti: 2012
Fq. 432
Pesha: 0.501 kg.
ISBN: 978-99943-1-808-7
Mbi librin
Një gazetar është zhdukur. Një mister i varrosur për shekuj me radhë është duke ardhur përsëri në jetë. Për të shkatërruar Islamin dhe botën. Ku kishin përfunduar paratë? Kjo është pyetja e fundit që Ned Rashi i bëri vetes, pak para se të zhdukej. Kur miku i tij Çarli u nis në kërkim të tij, dinte vetëm se gazetari amerikan ishte duke hetuar mbi shumat e mëdha të pashpenzuara kurrë për "rindërtimin e Irakut".
Por ajo çka Çarli nuk di, është se Nedi ka rënë në gjurmë të një sekreti që ka shkaktuar shumë viktima: operacioni Powerball, një komplot që, brenda pak ditësh, do t'i kushtonte Amerikës një president dhe pjesës tjetër të planetit një luftë botërore. Për këtë arsye, në Uashington, shefi i sigurisë së Shtëpisë së Bardhë po lufton kundër kohës për të shpëtuar jetët e Nedit, Çarlit dhe atë të tijën.
Dhe për këtë, në rrugët e Bagdadit, mercenarët e shoqërisë së fuqishme së sigurisë, Total Force, kanë shpërthyer në një gjueti të pamëshirshme kundër dy miqve. Së bashku më përkthyesin besnik, Hiqmatin dhe Lajlën e ëmbël, Çarlit i duhet të zbresë në qytetin e nëndheshëm të Naxhafit, të futet në zemër të Zonës së Gjelbër në Bagdad, të ndjekë rrugët e kontrabandistëve përgjatë kufirit me Sirinë si dhe të marrë një sërë vendimesh që mund të ndryshojnë historinë e botës myslimane: ta bëjë të njohur apo jo përmbajtjen e letrës së humbur në Qerbela, sekretin më të rrezikshëm të Islamit?
Një aventurë e bukur, e shkruar nga një reporter i vijës së parë të luftës, që të çon në zemër të një Iraku të shkatërruar dhe magjepsës, të pushtuar nga ethet e parave dhe gjakut. Misteri i vdekjes së profetit Husein, komplotet e së djathtës ekstreme amerikane, luftërat për pushtet mes klaneve të shkretëtirës dhe intrigat e spiunazhit ndërkombëtar, ndërthuren në një vepër premierë të jashtëzakonshme, që luan me zotësi në kufijtë mes trillimit narrativ dhe njohjes direkt të një skenari rrezikshmërisht real.
Fragment nga libri
Karimi u fut në fluksin e njerëzve që mbërrinin në Qerbela për të qenë më afër Allahut. Burra e gra bashkë shpejtonin hapin për në mauzoletë e Huseinit dhe të Abazit. Më fatlumët do të arrinin të preknin lehtë me majat e gishtave varret e dy martirëve. Lart në qiej, të ulur pranë Krijuesit, të dy princat prisnin nderimet e tyre dhe do t'ia tregonin Atij që shikon gjithçka. Dhe ditën e gjykimit të madh këta shpirtra nuk do të duhej të prisnin për të kaluar dyert e parajsës.
Pelegrinët ecnin ngjeshur njëri pas tjetrit dhe Karimi filloi të bërtiste për të hapur një shteg:
- Na lini të kalojmë! Na lini të kalojmë!
Karroca e tij përplasej pas këmbëve, kërcinjve, por ai nuk bënte kujdes: askush nuk priste edukatë nga një shpërndarës.
Brenda pak minutash libanezi mbërriti në perimetrin e fundit të sigurisë. Policë me uniformë kontrollonin burrat e rreshtuar në radhë të gjata nën diellin përvëlues. Altoparlantët thërrisnin Mehdiun, imamim e Kohës, atë që I Plotfuqishmi e kishte zgjedhur për të shpëtuar botën. Gratë me abaja të zeza kontrolloheshin në tenda, ku gra të tjera kishin për detyrë t'u ngrinin vellon.
Mbi autorin
Jacques Charmelot, gazetar dhe shkrimtar francez, ka jetuar në Uashington, Bejrut, Teheran, dhe është dërguar si reporter në frontet kryesorë të luftës këta vitet e fundit, në mënyrë të veçantë në Ballkan dhe Lindjen e Mesme. Në vitin 2008 ka punuar një vit në Bagdad si kryeredaktor lokal i Agjencisë Franceze të Lajmeve (AFP). Sot jeton mes Parisit dhe Romës.
