Lexuesi në kurth, eseistika e Kadaresë, Floresha Dado

Titulli: Lexuesi "në kurth": eseistika e Kadaresë (kopertina e trashë)
Origjinali: Lexuesi "në kurth": eseistika e Kadaresë
Gjinia: Studim letrar
Autori: Floresha Dado
Shtëpia botuese: Onufri
Viti: 2016
Fq. 328
Pesha: 0.524 kg.
ISBN: 978-9928-4354-0-8

Fragment nga libri

Energjike dhe provokuese në komunikimin me lexuesin, eseja e Kadaresë shfaqet në trajta befasuese, duke shkrirë në ligjërimin e saj tipare të artit letrar dhe të llojeve të tjera të krijimtarisë intelektuale. Një shkrimtar, i përmasave të Kadaresë, sigurisht që mbart brenda vetes edhe dimensionin e dijetarit.

Lidhja e brendshme, midis peshës që i jep fjalës artistike dhe qasjes racionale, mbi aspekte dhe problematika të ndryshme, sa konkrete – individuale aq edhe universale, formëson një strukturë komplekse të horizontit të tij krijues. Brenda këtij sistemi shpirti dhe dija realizojnë njëra – tjetrën.

Duke studiuar eseistikën e Kadaresë, i futemi një sfere të jashtëzakonshme të njohjes, të drejtpërdrejtë dhe të tërthortë, të mendimit dhe imagjinatës së tij. Pyetja nëse është vetëdija ajo që ka nxitur imagjinatën e përfytyrimeve, të shkëndijimit të tezave dhe hipotezave të reja, të përballjes me gjithë "botën", apo është intuita e brendshme që e çon drejt arsyetimeve origjinale, të diskutueshme apo dhe të pranueshme, është më e vështira, sidomos në këtë lloj krijimi.

Studimi se si mendimtari dhe shkrimtari, me mirëkuptim, i zënë vendin njëri – tjetrit, në shtresimet e brendshme të eseve, është një qasje specifike, e dallueshme nga interpretimi i krijimtarisë së tij letrare.

Sipas mendimit tim, këto janë dilema shumë interesante, që nxisin një mënyrë tjetër të leximit dhe kuptimit të thelbit të eseve të Kadaresë dhe që rizbulojnë vlera të tjera të këtij krijuesi – mendimtar të jashtëzakonshme.