Vdekja i ka sytë e kaltër, Luan Rexha

Titulli: Vdekja i ka sytë e kaltër (kopertinë e trashë)
Origjinali: La morte ha gli occhi chiari
Gjinia: Roman
Autori: Luan Rexha
Shtëpia botuese: Onufri
Viti: 2016
Fq. 210
Pesha: 0.466 kg.
ISBN: 978-9928-4354-4-6

Koment nga Blerina Suta

Romani i Luan Rexhës, me rrjedhshmërinë e stilit të drejtpërdrejtë shfaqet si një vepër, ku veprimet dhe jeta e personazhit kryesor, gazetarit aventurier dhe elegant Mikele Sermonti, janë të denja për skenografinë e një romani alla James Bond.

Mos frikja e autorit nga shkrimi i një vepre në kufij tipologjikë të ndërmjetëm vjen nga vetëndërgjegjja se vetëm stili e bart përmbajtjen, ashtu siç ndodh me personazhin e veprës, i cili mes formave ekscentrike të jetës, në ndjekje të vazhdueshme të elegantes për të realizuar pareshtur një profil prej dandy, ka luksin, mes formave dhe pamjeve prej belle epoque të përditshmërisë së tij, të ruajë të paprekura vlerën e thellë të gjërave.

Luan Rexha, me përvojën prej gazetari në Sicili dhe si i dërguar i Ansa – s në Paris e ka njohur peshën tragjike të mafias në indet më të thella të jetës italiane dhe europiane. Anti – jeta dhe shëmtia strukturore e mafias shpërfaqet në çdo detaj nëpërmjet historisë ikonike të Patricias së brishtë, viktimë e kriminelëve me "jaka të bardha", ku shëmtia ushqehet me figura të shtetit, të profesionistëve, të njerëzve në dukje të pastër.

Përgjigjja ekstreme e personazhit, Mikeles, nuk i shpëton paralelit me profilin e autorit, gazetar që ka refuzuar në mënyrë organike gangrenën e mafias, duke u impenjuar personalisht në luftën ndaj saj.

Ardhja në gjuhën shqipe e këtij romani është një homazh që Luan Rexha i bën gjuhës së të parëve të tij, përveçse një kontribut për emancipimin e shoqërisë shqiptare për një nga format më të skajshme të kalbëzimit të shoqërisë perëndimore prej të cilës rrezikohet edhe ajo vetë, në këtë fazë të përshpejtuar të zhvillimit të saj kapitalist.

Mbi autorin

Luan Rexha ka lindur në 1938, ka punuar si gazetar në Romë, Palermo dhe Paris. Në vitet gjashtëdhjetë ka kryer për "Giornale di Sicilia" kërkime mbi sulmet mafioze pas plojës së Ciaculli – t dhe tragjedisë së Belice – s.

Po për "Giornale di Sicilia" ka qenë i dërguari i vetëm nga perëndimi në Shqipëri gjatë periudhës së revolucionit kulturor të Enver Hoxhës. Në vitet 70 – 80 ka qenë kryeredaktor i Ansës për kronikat me jashtë.

Ka botuar shkrime dhe hetime për disa gazeta të rëndësishme të Argjentinës, Brazilit dhe Meksikës. Ka qenë pjesë e Këshillit Drejtues të revistës politiko – kulturore europiane "Euros". Në Paris, ku jeton prej kohësh, ka drejtuar agjensinë e Ansa – s për korrespondent.