Titulli: Rrëfimet e një gruaje bionde
Origjinali: Rrëfimet e një gruaje bionde
Gjinia: Roman
Autori: Margarita Stoja
Shtëpia botuese: Toena
Viti: 2014
Fq. 160
Pesha: 0.201 kg.
ISBN: 978-9928-4245-8-7
Fragment nga libri
- Pa dashje po tregohem i pabesë ndaj dashurisë sonë, por ti do të më falësh nëse mundesh, - i tha ai i sfilitur nga lodhja.
Loreta u befasua nga ky deklarim. Do të kishte dashur të ishte një zë i tjetërkujt, i largët, që s'kish të bënte me dashurinë e tyre; do të donte të kish qenë një vegim. Nuk guxonte ta shikonte në sy, por bënte sikur po drejtonte batanijen që kish rrëshqitur nga krevati.
Do të ish shumë e dhembshme për të dy të fejuarit e pafat. Filloi të sistemojë sendet mbi komodinë vetëm që të evitonte vuajtjet që do të provonin të dy po ta shikonte në sy.
Asaj i qenë mbushur sytë me lot dhe nuk kish tentuar as t'i fshinte dhe as t'i ndalonte ato të rridhnin. Brunoja ia mori edhe dorën tjetër dhe i vuri në fytyrën e tij. Loreta kish ndier t'i lageshin duart në sytë e tij.
Dy të dashuruarit po rebeloheshin me lot kundrejt atij fati aq mizor që po linte në mes dashurinë e tyre, që po rrëmbente këtë djalosh nga jeta. Po qanin të dy në heshtje, por asnjëri prej tyre nuk kish mundur të fliste.