Tokëmjalta, Enit Karafili Steiner

Titulli: Tokëmjalta
Origjinali: Tokëmjalta
Gjinia: Roman
Autori: Enit Karafili Steiner
Shtëpia botuese: Pegi
Viti: 2015
Fq. 312
Pesha: 0.348 kg.
ISBN: 978-9928-200-25-9

Mbi librin

Një rrëfim i shtruar, qetësues në sipërfaqe, e megjithatë mbartës i kontradiktave të modernitetit tonë sa të ngutur, aq edhe të vonuar. Një dashuri e hershme, rrjedha e së cilës bëhet jehonë e jetëve të rrëmbyeshme e të lodhshme të shqiptarëve, brenda dhe jashtë kufijve kombëtarë; dy personazhe të plota, të fuqishme, që duhen, ndahen, përpiqen e pothuajse digjen në betejën e tyre për t'u gjetur përsëri.

Pleksur me këta shpirtra luftarakë, zbulojmë një rrëfimtar që, si një varkë e vogël, pa vrulle të mëdha, lundron mbi rrafshin e një bote sa pa tronditje, aq edhe pa rehati. Dy rrugëtime drejt lumturisë, dy mendësi të kundërta. Të vjetra sa vetë bota? Mbase, por askurrë aq akute sa sot: idealizëm apo pragmatizëm? Cilin do të zgjidhnit?

Koment nga Ardian Vehbiu

Vepra e Enit Karafili Steiner – it është një shqiptim dramatik kundër rrymës, pse niset nga premisa – krejt e papritur – se e mira është e kudopranishme, njëlloj si dheu; dhe nuk kemi pse të mundohemi për ta sjellë, por veç na duhet të zotohemi për ta ruajtur dhe ushqyer; teksa e keqja nuk ka si të mbrohet ndaj ripërmasimit, me kusht që ne, si personazhet e romanit, t'i mbetemi besnikë deri në fund dhe pa kompromis njëri – tjetrit.

Fragment nga libri

Vendosa t'i dëboja hijet e trishtimit me gjumë. Kot s'e quajnë atë të uruar kushëriri i vdekjes dhe vera e mbretërisë së harresës... gjithçka do zërë vend,
Duhet...
Asnjë shqetësim më shumë e më pak nuk ndryshon çka jemi...
Ç'na ka bërë Shqipëria ç'i kemi bërë
Ka më keq larg...
Matanë shkretëtirës përtej ujërave
Ajo andej unë këtu...
I duhet futur një mendje e lehtë duhet marrë me sport
... që vrazhdësia të mos të zhubravisë e thinjë para vakti
Tiranamehelm Tiranamehelm...
...T ... m...

Mbi autorin

Enit Karafili Steiner, lindur në Tiranë, jeton prej më shumë se 20 vitesh në Zvicër. Ajo mban një PhD në anglistikë nga UCLA dhe Universiteti i Zyrihut, është asistent profesore në Universitetin e Lozanës dhe autore e disa librave dhe artikujve akademikë në letërsi angleze. Ky është romani i saj i parë.