Titulli: Kështu na vret jeta
Origjinali: Kështu na vret jeta
Gjinia: Roman
Autori: Frederik Moçka
Shtëpia botuese: Toena
Viti: 2014
Fq. 184
Pesha: 0.301 kg.
ISBN: 978-99943-1-992-3
Fragment nga libri
Rrezet e diellit i lëbyrën sytë. Gjergji u ngrit nga gjumi i ferrit me sy të mbufatur. Brodhi sytë nga shtëpia e heshtur, me dyer të shqyera ku era e fortë e natës së kaluar kishte lojtur vallen e përditshme me gjethet e thara dhe halat e pishave, duke i flakur andej-këndej sipas trilleve të saj. U çua në këmbë tërësisht i drunjëzuar, u fut brenda si somnambul, i ra shtëpisë qark, vështroi nga pylli shpresëplagosur se mos e shihte së bashku me Pushin e pandarë.
Në bregun e braktisur qëndronte trungu murg, që i pati shuar shpresën e rrejshme të çastit. Asgjë veç rropatjes së dallgëve në breg, trandjes së zemrës që trokiste fort si të donte të shqyente dërrasën e kraharorit e të fluturonte s'di se ku hapësirave të pacak, fëshfërimës së erës nëpër degët e pemëve, që po i kthjellonin mendimin se kishte ngelur vetëm përballë peshës së jetës, pesha e të cilës i rëndonte e pamundur për ta mbajtur.
Zemra, beze e grisur e laturisur me gjak. Pa thikën e hedhur përtokë, elektrikun e thyer, batanijen e pluhurosur nga rëra e sjellë gjatë natës dhe ndenji i shushatur, indigjen i braktisur në kryqëzimin gllabëronjës të ndonjë metropoli.
- O Zot, pse ma more? - ulëriu me gjithë forcën e mushkërive si bishë e plagosur.