E katërta, Balil Gjini

Titulli: E katërta...
Origjinali: E katërta...
Gjinia: Roman
Autori:Balil Gjini
Shtëpia botuese: Zenit Editions
Viti: 2013
Fq. 232
Pesha: 0.234 kg
ISBN: 978-9928-113-22-X

Fragment nga libri

Shenja e hatasë që do të pllakoste qytetin tonë ishte dhënë qysh më parë, ishte dhënë qysh kur një tufë korbash i lanë sprethet e shkëmbinjve e të honeve dhe filluan të vejevinin mbi akrepat e sahatit të qytetit tonë, duke kruar sqepat në ta, duke u cpërfëndur gjithë sevda zie me njëri – tjetrin dhe, ç'është më e keqja, duke i ngarkuar ata me glasa të përhime.

I ngarkuan aq shumë, sa akrepat e shkretë dolën mendsh fare, filluan të vërtiten kuturu, të ecnin më shpejt, deri sa, për të mos plasur nga marazi, ndaluan dhe dukeshin mbi fushën e sahatit si dy eshtra të balsamosura.

...E mbajti letrën lart me të dy gishtat, e afroi tek xhami, i pa transparencën e qelibartë. Në fillim letra iu duk si një qefin, me të cilin do të mbështillte trupat e fjalëve, pastaj, si një gjoks femre, nga i cili pritej të ngriheshin dy kodrinat e rrumbullakta të gjinjve, dhe në fund fare si napa e bardhë e një tavoline operacioni.