Ëndrra e Damokleut, Fatos Kongoli

Titulli: Ëndrra e Damokleut
Origjinali: Ëndrra e Damokleut
Gjinia: Roman
Autori: Fatos Kongoli
Shtëpia botuese: Toena
Viti: 2004
Fq. 280
Pesha: 0.311 kg.
ISBN: 978-9928-205-18-6

Mbi librin

"Ëndrra e Damokleut", një ritregim bashkëkohor, në variantin shqiptar, i historisë së përjetshme të Romeos dhe Zhuljetës. Në sfond, ngjarjet tragjike të marsit 1997, vitit të çmendurisë kolektive të shqiptarëve. Ergysi dhe Linda, njëri student në degën e letërsisë, tjetra studente për pikturë në Akademinë e Arteve, paguajnë haraçin e rëndë të kësaj çmendurie. Dhe të urrejtjes së ndërsjelltë të familjeve të tyre, të armiqësuara në kalvarin e gjatë absurd të luftës së klasave.

Ky është libri i katërt i ciklit "Burgjet e Kujtesës", ku secili roman qëndron më vete, pa lidhje me të tjerët, veç një frymë e përbashkët që sjell ngjyrat e epokës. Libri ka fituar çmimin ndërkombëtar Ballkanika 2002, dhënë në Sofie të Bullgarisë. Ka fituar gjithashtu çmimin e librit më të mirë në prozë për vitin 2002, dhënë nga Ministria e Kulturës, Rinisë dhe Sporteve.

Fragment nga libri

Në fillim nuk e njoha, s'kisha nga ta njihja. Mua nuk më kishte qëlluar kurrë të shihja ndonjë vizatim, ndonjë gravurë, të lashtë apo moderne, me pamjen e tij, madje nuk dija asgjë tjetër për të veç emrit. Dhe emri shoqërohej gjithmonë nga një shpatë, e njerëzit e përdornin pa e ditur, siç nuk e dija edhe unë, cila qe historia e vërtetë e atij njeriu të lidhur në amëshim me fjalën shpatë...

Para meje qëndronte një burrë pak i kërrusur, mbështjellë në një tunikë të bardhë elegante... m'u duk si një shtatore prej bronzi. Në njërin krah të shtatores qëndronin dy skifterë. Deri një çast më parë ata kishin çukitur kokën time me sqepat e hekurt e tani rrinin të gatshëm të më suleshin sapo t'i lëshonte i zoti. Ky e kuptoi frikën time. Dhe qeshi. Mos u tremb, tha... Ata nuk janë skifterë... Ky çift skifterësh virtualë përfaqësojnë fjalët "Shpata e Damokleut". Këtë askush përveç meje nuk mund ta dijë më mirë. Sepse unë jam vetë Damokleu.

Mbi autorin

Librat e Kongolit janë botuar në Francë, Itali, Zvicër, Greqi, Gjermani, Sllovaki e Bullgari, me jehonë në disa nga gazetat dhe revistat më të mëdha Europiane si Le Monde, Le Figaro, La Stampa, Le Temps, Le Soir, L'Express, Magazine Literaire, Der Tagesspiegel, etj. Është tri herë fitues i çmimit vjetor për librin më të mirë në prozë dhënë nga Ministria e Kulturës (1995, 2000, 2002), si dhe i çmimit Velia (2000). Është fitues i çmimit ndërkombëtar "Balkanika" 2002. Është gjithashtu fitues i çmimit më të lartë letrar në Shqipëri "Penda e Artë" (2004).