Xhevahir Spahiu, sfidat e poetit, Nuri Dragoj

Titulli: Xhevahir Spahiu, sfidat e poetit
Origjinali: Xhevahir Spahiu, sfidat e poetit
Gjinia: Biografi
Autori: Nuri Dragoj
Shtëpia botuese: AlbPaper
Viti: 2012
Fq. 416
Pesha: 0.40 kg
ISBN: 978-9928-05-056-4

Fragment nga libri

Xhevahiri lindi në një kohë të trazuar, në mesin e shekullit të luftërave, atëherë kur lokomotiva duket se bën një ndalesë, hedh vështrimin mbi gjurmët e qindvjeçarit që ende s'janë fshirë, pastaj largohet në binarët e trasesë, e cila zgjatet mbi kufomat e ëndrrave të patretura. Mori jetë atje ku qëndrojnë perënditë, në lartësitë e natyrës dhe madhështisë së korieve, atje ku e mat veten me malet, ku kuvendon me hyjnitë.

Dhe ka shkruar për vendin e tij, që ka gëlltitur ngjarjet pas mënyrës së vet, duke mbetur ashtu, i virgjër në kryeneçësinë e tij, i lirë brenda hapësirave të veta, përsëri miqësor, edhe me ata që i kanë treguar bajonetat dhe zjarrin, ushqyer nga fisnikëria, jo nga përulja apo ndjenja e të qenit i vogël.

Vargjet e Xhevahirit tregojnë se ky popull s'ka qenë në gjumë asnjëherë. S'ka qenë memec. Ka folur me krisma, por ka thënë edhe fjalën e tij, atëherë dhe atje ku duhej, aq sa ka mundur, me zëdhënësit e tij, dijetarë e diplomatë, që kanë ideuar perandori, filozofë që kanë ndriçuar mendjet njerëzore.