Mrekullia e fajit, Danielle Steel

Titulli: Mrekullia e fajit
Origjinali: One day at a time
Gjinia: Roman
Autori: Danielle Steel
Shqipëroi: Kozeta Çuadari
Shtëpia botuese: Uegen
Viti: 2009
Fq. 208
Pesha: 0.301 kg.

Mbi librin

"Mrekullia e fajit" gati të çon në titujt e veprave mesjetare, kur duhej t'i besonin fatit, jetës së dyzuar, plagëve që shëroheshin me një shikim të thjeshtë dhe njeriu befas ngrihet në këmbë. Jo, nuk kemi të bëjmë me diçka të tillë.

Ngjarjet janë të thjeshta, të zakonshme, të ditës dhe befas marrin pamjen e groteskut, bëhen të fuqishme, të mëdha, marrin formën e njeriut dhe fitojnë ndërgjegje, nuk humbasin nëpër sfidat ku mund të treten e të harrohen.

Thelbi është gabimi, faji njerëzor, i cili mund të lindë një fëmijë, mund të shërojë një të sëmurë psikik, mund të ndajë një familje, mund të krijojë vlera të fuqishme e të paharrueshme, mund edhe të të degdisë, të të harrojë e përsëri të mbetet vlerë. Sepse, tek e fundit, mrekullia e jetës është veç harresa!

Danielle Steel di të depërtojë në psikologjinë e personazheve të saj, di të ndërtojë atmosferën e bukur të analizës dhe të një realiteti nga më të veçantët edhe kur ngjarja është gati e lemerishme. Danielle Steel di që të dalë nga gjendja me realizëm, sepse në një rrugë si kjo edhe futet në ngjarje.

Aty vepron njeriu i saj, një njeri i bukur (grua a burrë qoftë), aty nuk luhet një "realitet shou", aty gdhendet personalitete të panjohur dhe mbeten për jetë. Kushdo e beson këtë të vërtetë dhe gjithnjë gjenden rrugëzgjidhje të besueshme, njerëzore e jo sikur të vijnë nga qielli, as edhe nga qielli i Hollivudit!

Marrëdhëniet nënë fëmijë janë një përvojë e hatashme e shkrimtares e cila ka lindur e rritur nëntë fëmijë dhe që thuajse të gjithë librat ua dedikon atyre, asaj mrekullie të jashtëzakonshme njerëzore që ka fituar nga jeta.

Danielle Steel është shkrimtare me përvojë dhe me një sens të hollë. Ajo të habit me kthesat aq të thjeshta e të kuptueshme për të gjithë në jetë. Asaj i bën përshtypje gjithçka dhe e rrëmben përmbytja që shkaktojnë ndjenjat dhe emocionet, pa e lënë kurrë personazhin e saj që "ta marrë lumi" i tronditjes apo i përkëdhelisë. Ajo përulet thellë përpara realitetit ku jeton, i jep elegancë të veçantë jetës dhe merr nga jeta një aromë dehëse, nektarin e përsesë të madhe për të cilën jeton dhe krijon.

Dhe ti sa mbyll faqen e fundit të librit, thua: Po, ky është një faj i mrekullueshëm. Dhe merr frymë thellë nga tronditja dhe shpirtin e mbushur plot. Përbrenda teje fryn një fllad i freskët jete...