Ftesë për flirt, Flutura Açka

Titulli: Ftesë për flirt
Origjinali: Ftesë për flirt
Gjinia: Poezi
Autori:  Flutura Açka
Shtëpia botuese: Skanderbeg Books
Viti: 2015
Fq. 128
Pesha: 0.158 kg.
ISBN: 978-9928-4279-4-6

Fragment nga libri

Ne

Ne,
Të lodhur nga etiketa
Nga ngjyrat
Nga terrori i dritave
Nga diktatura e lirisë,
Bjerrë nga dëshira për ndryshim,
Sfilitur nga vrapi drejt mirazhit Perëndim,
Përndjekur nga i yni padurim,
Prehemi tani në një cep bote
Nën të njëjtin diell
Sekush hënës së tij.

Ne, visengrënët
Rrëqethur nga koha,
Kujtesës i klithim,
I mbajmë zemërim.

Me pass i kalojmë tani kufijtë,
Me martesa të huaja "helmojmë" genet
E ndreqim fëmijtë.
Me viadukte ajrorë
E lejeqëndrim fuqiplotë,
E mundëm botën: botën kokëfortë,
E mundëm veten: veten kokëshkretë.
Fituam betejën me llojin tonë.

Ne tani,
Jemi – s'jemi shqiptarë
Jemi – s'jemi mërgimtarë
Jemi – s'jemi ata që jemi.

Ne jemi Ne,
Edhe pse para një kupe kafeje
Në dhe të huaj
Të huaj jemi ende...

Ne qytetarë të durimit,
Hamej nostalgjish,
Nga zori për shqipen e çalë
Që rrugëve ronitëm,
Kthehemi t'i lypim falje
Gjakut të Atdheut
Me përulje perëndish.