Poezi, Oskar Milosz

Titulli: Poezi
Gjinia: Poezi
Autori: Oskar Milosz
Shqipëroi: Zimo Krutaj
Shtëpia botuese: Pika pa sipërfaqe
Viti: 2016
Fq. 175
Pesha: 0.173 kg.
ISBN: 978-9928-185-24-2

Fragment nga libri

Kur të vijë ajo...

Kur të vijë ajo – do të bëhet gri apo e blertë në sytë e saj,
E blertë në lumë apo gri?
Ora në këtë të ardhme kaq të lashtë do të jetë lajm,
Lajm, por kaq pak i ri...
Orë të vjetra ku çdo gjë u tha, çdo gjë u ëndërrua, çdo gjë u pa!
Nëse e dini hallin jua qaj...

Do të jenë të sotmet dhe zhurmat e qytetit
Krejt si sot e gjithnjë – prova të rrepta shumë! –
Dhe aromat – sipas stinës – të shtatorit a prillit
Dhe qiej të rremë dhe ca re nëpër lumë;

Dhe fjalët - sipas çastit - gazmore a me ngashëri
Nën qiej të gëzuar a që rigojnë shi,
Se ne do kemi jetuar e jemi shtirur, ah! kaq shumë,
Kur të vijë ajo me sytë e saj prej shiu mbi lumë.

Do të jetë (zëri i mërzisë, qeshje e dobësisë)
Çasti shterpë i tanishëm, i moçëm, i thatë,
Rrahje e një përjetësie motër e qetësisë;
Çasti i tanishëm, krejt si në këtë çast.

Dje, dhjetë vjet më parë, sot, për një muaj,
Fjalë të tmerrshme, mendime të vdekura, po ç'vlerë ka!
Pi, fli, vdis, - bëjmë mirë t'ia mbathim nga vetja,
Në një mënyrë a në një tjetër pra..