Titulli: Poezi të zgjedhura
Origjinali: Werke
Gjinia: Poezi
Autori: Friedrich Hölderlin
Shqipëroi: Denata Qazimi
Shtëpia botuese: Zenit Editions
Viti: 2015
Fq. 64
Pesha: 0.101 kg.
ISBN: 978-9928-113-34-4
Fragmente nga libri
Gjysma e jetës
Me dardha të verdha dhe
Trëndafila të egër ngado
Varet bregu mbi liqen,
Ju mjellma të hirshme
Dhe të dehura puthjesh
Kridhni kokat
Në ujin krejt të kthjelltë.
Ah, ku t'i gjej lulet
Në dimër, dhe ku
Ta gjej dritën e diellit
Dhe hijen e tokës?
Muret janë të prajtë e të ftohtë, në erë
Rrapëllijnë flugerët.
Shpirti i kohës
Prej kohës sundon mbi kryet tim
Lart në renë e rrit, o ti Hy i Kohës!
Tmerr e frikë rreth meje, ngado
Hedh sytë gjithçka tundet e rroposet.
Ah! Si djalosh, shpesh vështroj përdhe,
Shpëtimin prej teje e kërkoj ndër guva,
Dhe kërkoj, i marri, një vend,
Ku ti s'je, o Rrënues!
Lermë, o Atë, tembramja të Të takoj
Syhapur! A nuk e zgjove Ti për s'pari me rreze
Shpirtin në mua, a nuk më solle,
Ti, o Atë, mrekullisht një jetë?!
Vërtet, nga degët e hardhisë na bulon forcë e shenjtëruar;
Në ajër të butë takon vdekatarët një Hy i kthjellët,
Kur prajtë këta nëpër korie enden;
E prapë Ti, o i Gjithpushtetshëm, u zgjon
Djemve shpirtin e qashtër, dhe u mëson
Artet e urta e të moçme; e keqja veç
Stërkeqet, për të shpejtuar fundin,
Kur ti, o Rrënues, ta vësh përfundi!
Mbi autorin
U lind më 20 mars 1770 në Lauffen (Neckar). Babai i tij ishte mirëmbajtësi i një manastiri, ndërsa e ëma vajzë prifti. Prej të ëmës u mëkua me frymën e përshpirtërisë. Deri më 1784 ndoqi shkollën në Nürtingen dhe Denkendorf. Meqënëse prindërit dëshironin të bëhej teolog, ndoqi seminarin në Maulbronn.
Nga viti 1788 der më 1793, studioi në seminarin teologjik në Tübingen, ku zuri miqësi me Hegelin dhe Shelingun. Pa kaluar shumë kohë, i braktisi studimet dhe në vitet 1793 – 1794, me ndihmën Schiller – it, nisi punë si mësues i Charlotte von Kalb – it në Ëaltershausen, Thüringen.
Më 1794, filloi studimet universitare. Dy vjet më vonë, zuri vend si mësues privat pranë bankierit Gontard në Frankfurt. Me të filluar punën, i dha fund marrëdhënies me të shoqen e bankierit, Suzetën.
Më 1797 u takua me Gëten. Vitin në vazhdim e kaloi në Stuttgart dhe Nürtingen. Dy vjet më vonë, përkatësisht më 1802, punoi si mësues në Zvicër dhe në Bordeaux. Nga viti 1802 deri më 1804, i shkatërruar nga sëmundja, qëndroi pranë së ëmës.
Më pas, falë ndërhyrjes së Isaak von Sinclair – it, filloi punë si bibliotekar në Hamburg. Më 1806 u shtrua në spital. Prej vitit 1807 e deri në ditën që vdiq, më 7 qershor 1843, jetoi në familjen Zimmer në Neckar.