Toka të pabanuara, Sokol Zekaj

Titulli: Toka të pabanuara
Gjinia: Poezi
Autori: Sokol Zekaj
Shtëpia botuese: Pika pa Sipërfaqe
Viti: 2017
Fq. 191
Pesha: 0.203 kg.
ISBN: 978-9928-185-52-5

Fragmente nga libri

Vija blu

Sa më shumë hapet qielli
Bëhet më blu.
E pamundura afrohet,
E mundura largohet.

Dikur e përfytyroja veten
N'udhëtime me kuaj,
Me priftin dhe filozofin
Me baulet plot libra.

Kur qiellin shohim gjatë
Nis erë e ftohtë,
Kështu sodis, një shkop
Ngulur në tokën e zhveshur.

Ndonjëherë dora

Ndonjëherë dora
nuk i bindet mendjes,
dhe shkruan gjëra
që vetë i di,
pasi ndonjëherë
e mbledhur grusht
ka mendjen e vet.

Një zë në errësirë

Do të marrësh sëpatën.
Do të shkosh në pyll.
Do t'i biesh këmbës sate!
Këmba do të çelë filiza.
Filizat do hedhin rrënjë në tokë.
Ti do mbetesh në pyll.
Zemra do të bëhet zog!

Mbi autorin

Sokol Zekaj ka lindur më 30 gusht 1948 në Koplik, Shkodër. Është autor i shumë vëllimeve poetike, gjithashtu ka shkruar dhe mjaft ese dhe ka bërë përkthime nga poezia franceze dhe italiane. Është autor i romanit "I nëmur dhe i bekuar". Me librin "Vera fantastike" (2003) ka fituar çmimin kombëtar të poezisë "Pena e argjendtë".