Hyllirikum, për monadën e detit dhe barkun e dheut, Krenar Zejno

Titulli: Hyllirikum, për monadën e detit dhe barkun e dheut (kopertinë e trashë)
Origjinali: Hyllirikum, për monadën e detit dhe barkun e dheut
Gjinia: Poezi
Autori: Krenar Zejno
Shtëpia botuese: Zenit Editions
Viti: 2012
Fq. 80
Pesha: 0.295 kg.
ISBN: 978-9928-113-15-7

Fragment nga libri

Ndërkaq, e sikur nën tjetër nur e hir hënor, pozon barka ende e shlirë
Natyrshëm muzgut për ndonjë piktor. Që vjen diku e ndryn varka
Në tablo si të dojë ta llokoçisë sfondin me det e të shtrijë penelin nëpër
trajta ovale e forma të ndjera vezake, në prani të ngjyrës klasike mavi!
Apo ndonjë poeti, patjetër do mund t'i voliste barka kur shkon
Kësoane sado ai e di se janë vende të dala prej kohësh
Nga fokusi i çka quajnë bashkëkohësi, e ku
S'mund të endesh gjatë, pa e pësuar
Në poezi, atë lloj pëshpërime
Të dikurthirrur nostalgji.
E megjithatë, barka do t'i shërbente aty ku, për shembull, i hyn edhe i rri mirë
Në rimën e thyer si me pahir të vargut ndër fjalët si ar, varr, varra, arkë, varkë
Apo, kushedi, hark, çark, qark, farkë, edhe pastaj për të sajtin herë përsëritur
Lojën e fjalës në rrokje të emrit të vaporit të mbytur: Hy, yll, liri, lirë a lirik
Sa për t'mbërritur një ritëm disi të ri, mbi atë ritual pagan arkanësh poetik
Antik sa deti dhe sfondi i simboleve të tij plot sirena dhe shtriga të mbira
Për të magjepsur dhe, fill pas shprishjes së magjisë, të mbëra shkëmbinj.