Erotikrisht ne kohen e shkruar, Krenar Zejno

Titulli: Erotikrisht në kohën e shkruar, erërat e Erosit
Origjinali: Erotikrisht në kohën e shkruar, erërat e Erosit
Gjinia: Poezi
Autori: Krenar Zejno
Shtëpia botuese: Zenit Editions
Viti: 2015
Fq. 80
Pesha: 0.167 kg.
ISBN: 978-9928-113-31-9

Fragment nga libri

Poemth i kristaltë

Çdo pikël mrekulli kristalizon çastin e vet.
Dhe secili çast buron nga Krishti që takon.

Kjo botë s'ka të brendshme ta fshehë
Nuk mvesh magji drite as mister terri.

Ato rrudhat brazda në të çarat e dheut
S'mbijnë asnjë brendi, janë veçse udha

E brengës sonë endacake për një krisje
Farash, që s'i mbollëm dot në këtë botë.

Botë e pabotë, rrënjëshkulura me rrënjë
Pisha, bredhi në shi, qajnë lot krokodili

Jepet ajo e gjitha në lojën që i luan rasti
Ku llavës eros i shkrehemi e shkrihemi

T'i brendashkruajmë vetvete kësaj bote
Hijë truar hiresh, ku hiri skajet shenjon.

Çdo pikël mrekulli kristalizon çastin e vet.
Dhe secili çast buron nga Krishti që takon.

Botë që krekoset kot tek shkëlqimi i yllit
Kuptimi i prajtë nga mërmërimat e pyllit

E papërgjegjshme botë, që s'din të gjegjet
Për rrëmete e zotësi me tepri, pa vetvete

Ysht të ulet sipari si një qefin triumfi fuqi
S'ka ndal ne inskenime dhe gjëmime apel

Skenë ku hyn e ndryn kortezhi i korbave
Për aktin ku ia luan fenë dhe sythit që çel

Porse aq sytha sa dëshironi t'i ketë për vete
Njeriu ia ka dalë t'i mbrojë dhe t'i mbrujë

Me eros drite brerore skrupujsh njerëzore
Epifani vajesh, akuarel, nota, penë e penel.

Çdo pikël mrekulli kristalizon çastin e vet.
Dhe secili çast kris diamantin që përfton.

Nga një sisë njeriu thithet aq afsh melodi
Sa e tërë cicërima e krejt trumbave ajrore

Por, pa një shushurimë të së parrokshmes
S'do t'jehonte askush një trajtë tingullore

Vjen një çast e llava ngop kurmin brendie
Dhe lënda kris kallëpin të urojë shtatoren

Mbarë e plastë!

Çdo pikël mrekulli shpështjell çastin e vet
Dhe secili çast shpërthen Krishtin që i përket.