Titulli: Poezi
Origjinali: Poezi
Gjinia: Poezi
Autori: Sokol Zekaj
Shtëpia botuese: Pika pa sipërfaqe
Viti: 2014
Fq. 434
Pesha: 0.402 kg.
ISBN: 978-9928-185-06-8
Fragment nga libri
Në shi
O, se ç'vetmi pikon ky shi!
S'di kush më do as s'di kë dua,
Të vetmet gjëra në shoqëri
Janë pikat e ujit thua m'thua.
Mëndafshi i mjegullës u shtrydh
Dhe uji rrodhi në përrua
Gjithë çka n'zemër dje m'u mbyll
Sot rrodhi krejt lirisht në mua.
Dhe vegimet që ndjeva dikur
Kaltri n'kristale yj'sh t'praruar,
Më ranë kësaj zalline si gurë
Pa dritë as zë nën shiun e shtruar.
O, se ç'vetmi pikon ky shi!
S'di kush më do as s'di kë dua,
Çdo gjë më shkon në det të zi
Çdo gjë m'vjen në kohë të shkuar.
Për poezinë
1.
Më ndodh ta ndjej sikur ec
Nëpër zhur,
Por dua ta ndiej sikur ec
Nëpër lëndinë
Ku diçka lulëzon, diçka
Farat ka pjekur.
2.
Le t'u ngjajë
Poezia,
Drurëve
Por jo gjetheve.
Ose edhe gjetheve
Nëse lënë një prarim
Në ditarin
e drurëve.
3.
Mandej e pastrova poemën
Dhe lashë
Veç gjërat e argjendta,
Nën kërshërinë e syve të uritur,
Fjalë pas fjale
Si orizin.
4.
Problemi nuk është
të jetoj unë
me poezinë.
Problemi është
Të jetojë poezia
Në mua.
Unë thjesht të kuptoj
Seriozitetin
E saj.
Mbi autorin
Sokol Zekaj u lind më 1948 në Koplik, Shkodër, rajoni veriperëndimor i Shqipërisë. Është autor i shumë vëllimeve poetike. Por ka shkruar dhe mjaft ese, dhe ka bërë përkthime nga poezia franceze. Gjithashtu është autor i një romani. Me librin "Vera fantastike" (2003), ka fituar çmimin kombëtar të poezisë, Pena e argjendtë.