Pema e dëshirave, Katherine Applegate

Titulli: Pema e dëshirave
Origjinali: Wishtree
Gjinia: Roman
Autori: Katherine Applegate
Shqipëroi: Nikolla Langore
Shtëpia botuese: Bota Shqiptare
Viti: 2018
Fq. 216
Pesha: 0.231 kg.
ISBN: 9789928003065

Mbi librin

Natyrisht, pemët nuk mund të bëjnë shaka. Por, sigurisht, ne mund të rrëfejmë histori... Kuqoja është një lis me shumë rrathë moshe. Kuqoja është "pema e dëshirave" e lagjes; njerëzit i shkruajnë dëshirat e tyre në copa pëlhure dhe i varin ato në degët e Kuqos.

Bashkë me një sorrë me emrin Bongo dhe me kafshët e tjera që strehohen në zgavrat e saj, kjo pemë dëshirash vigjilon mbi lagjen. Ju mund të mendonit se Kuqoja i ka parë të gjitha. Derisa në lagje vjen një familje e re. Jo të gjithë janë të mirëpritur dhe përvoja e Kuqos si pemë dëshirash bëhet më e rëndësishme se kurrë.

Zbavitës, plot mendim, plot ndjenjë e hijeshi, ky libër është ndoshta libri më i mirë i Katherine Applegate; libër që buron nga shpirti e që rrëfehet nga një këndvështrim krejtësisht i pazakontë.

Komente mbi librin

"Plot ngrohtësi e mendim, kjo histori rrëfehet nga perspektiva e një lisi plak që ka parë gjithçka në jetë. Shkrimtarja e bestsellerëve Katherine Applegate i mban lexuesit të lidhur pas pemës së vjetër, ashtu siç janë të lidhur pas saj kafshët e njerëzit që jetojnë tek ajo dhe pranë saj. Ky rrëfim i shkurtër por i ngjeshur i drejtohet lexuesve të shkollës nëntëvjeçare që kanë nisur të pëlqejnë romanet me pak ilustrime por që përmbajnë më shumë mendim."

Seira Wilson, redaktore në Amazon

""Pema e dëshirave" nga Katherine Applegate është pikërisht ajo që mund të presë lexuesi nga një shkrimtare që ka fituar medaljen "Newbery". Plot mendim, prekës dhe në kohën e duhur. Është një histori që do t'i shtyjë nxënësit e shkollës nëntëvjeçare të mendojnë e të diskutojnë, çka është saktësisht ajo që pritet nga letërsia e mirë."

Alice Cary, BookPage

Mbi autoren

Katherine Applegate është autore e librit Ivani unik dhe i pashoq, fitues i Newbery Medal. Romani i saj i fundit, 'Krenshau', qëndroi mbi njëzet javë në listën e bestsellerëve të New York Times. Ajo ka shkruar edhe romanin Shtëpia e guximtarit. Katherine Applegate jeton me familjen e saj në Tiburon të Kalifornisë.