Titulli: Përralla të së ardhmes
Gjinia: Përralla
Autori: Grup Autorësh
Shqipëroi: Mimoza Mema
Shtëpia botuese: Albas
Viti: 2013
Fq. 64
Pesha: 0.322 kg.
ISBN: 978-9928-02-334-6
Mbi librin
Tetë përralla për kohët e ardhme, plot fantazi, aventura dhe humor, shkruar kryesisht për të rriturit, që t'ua tregojnë fëmijëve në mbrëmje e të nxitin dëshirën e tyre për t'i lexuar vetë. Në këtë vëllim janë përmbledhur përrallat: "Raketa e Lilit" dhe "Zoe dhe dy robotët" të Agnès Laroche; "Galakta, qyteti i ujit" të Sèverine Onfroy, "Dy shpëtimtarë origjinalë" të Charlotte Grossette; "Një Poni me syze" të Ghislaine Biondi; "Një miushe në hapësirë" dhe "Një vjedhje në lartësi" të Sophie de Mullenheim dhe "Në Hënë" të Èleonore Cannone.
Fragmente nga libri
Raketa e Lilit
Sot është gara e raketave në hapësirë. Lili, me kaskën në kokë dhe me duart te marshet ësthë gati për t'u nisur në fluturim, sapo të dëgjohet krisma e sinjalit. Pranë saj pjesëmarrësit e tjerë po bëjnë përgatitjet e fundit. Dikush po vidhos akoma edhe një bulon. Dikush tjetër po merr me vete edhe një bidon rezervë me karburant... Herë pas here ata i hedhin një sy tallës Lilit dhe raketës së saj. E shkreta, mëton të fitojë me një raketë të tillë.
Galakta, qyteti i ujit
Ka shumë kohë që qyteti Galakta u mbulua nga uji dhe banorët nuk shohin më tokë me sy. Niveli i ujit sa vjen e ngrihet. Për t'i shpëtuar ujit, shtëpitë janë vendosur mbi këmbë metalike që hapen e mbyllen, sa herë dallga ulet e ngrihet. Shtëpia e Moanës, si të gjitha shtëpitë e tjera, kaloi mbi pemë, mbi kodra, male... Ndërkohë, rrugët, parqet, pyjet u zhdukën, i përpiu uji. Të gjitha nën ujë!
Zoe dhe dy robotët
Zoe e adhuron robotin e saj fringo të ri, Bang U – në. Është një model super i sofistikuar, që i bën të gjitha gjërat. Ai di të bëjë edhe ëmbëlsira të mira. Me këtë robot nuk mërzitesh kurrë. Sot, Zoe ka luajtur gjithë ditën dhe është shumë e lodhur. Kur shtrihet në krevat, para se të flejë, asaj i shkon mendja tek Glink O – ja, roboti i saj i vjetër dhe gjithë ndryshk.
Dy shpëtimtarë origjinalë
Që kur makinat kanë filluar të ecin mbi ujë, shpesh ka shumë trafik në mes të detit. Prandaj, Martini vendosi të niset për pushime që herët në mëngjes. Ai kishte shkuar shumë larg në det, kur njëri nga radarët e bordit jep alarmin:
- Kujdes, kujdes! Rrezik përpara! Ktheje timonin nga e majta!
Martini i bindet, por është shumë vonë. Ai nuk mundi ta mënjanonte rrezikun dhe u përplas me një tufë iriqësh deti.
Një miushe në hapësirë
Në vitin 2146, pothuajse të gjithë i kalojnë pushimet në Hënë, në Mars dhe, madje, edhe në Jupiter. Në këto udhëtime ata mund të bëjnë xhiro rreth Diellit, mund të varin një yll në qiell ose të bëjnë sërf në bishtin e një komete. Megjithatë, Leona, miushja e vogël simpatike, nuk është larguar asnjëherë nga Toka. Nuk ka pasur fatin të udhëtojë në hapësirë. Ajo ëndërron... ëndërron t'u afrohet yjeve dhe të ulet në cepin e Hënës.
Një Poni me syze
Çdo të mërkurë, Sara bashkë me të tjerë, hipin në teleferik dhe, përmes pyllit me asteroide, përshkojnë Galaktikën. Vendmbërritja e saj është planeti ku banojnë gjyshet dhe gjyshërit. Ai është një yll i vjetër i paprekur. Gjyshërit ikën atje, sepse nuk po duronin më ndryshimet në Tokë!
Një vjedhje në lartësi
Dielli po perëndon në horizont, ndërsa Netoja, roboti i vogël, po pastron xhamat e katit të fundit, të njëqindtit. Ja dhe disa xhama dhe i përfundon krejt. Tani po mbaron dritaret e sallës së kasafortave. Kur, papritur, dallon një hije. Ai heq shkumën, vështron më mirë nëpërmjet xhamit dhe shikon një burrë të veshur me të zeza e me një kapuç në kokë.
Në Hënë
- Lukas, Lukas... – pëshpëriti një zë i largët.
Lukasi mërmërit diçka nëpër dhëmbë.
- Lukas, - këmbënguli zëri, - është koha për t'u zgjuar.
Lukasi mezi hap sytë. Mami po i qëndron mbi kokë duke i buzëqeshur.
- Hajde! Nxito! Bëhu gati, shpirt! – i flet ajo ëmbël e ëmbël. – Mëngjesi është gati. Gjërat e tua i ke mbi karrige.
Lukasi çohet ngadalë dhe shikon rrobat gjithë kureshtje. Mami kishte lënë aty një kostum dhe një palë çizme të argjendta. Përse vallë? Papritur u kujtua. Sot ai kishte ditëlindjen dhe mbushte 8 vjeç!