Zgjidhja e nje misteri, Perparim Zaimi

Titulli: Zgjidhja e një misteri
Origjinali: Zgjidhja e një misteri
Gjinia: Mister
Autori: Përparim Zaimi
Shtëpia botuese: Adel Print
Viti: 2011
Fq. 194
Pesha: 0.301 kg.
ISBN: 978-99956-32-15-1

Mbi autorin

Përparim Zaimi ka lindur më 12 mars 1948 në Dobrushë të Skraparit. Arsimin fillor 7 vjeçar dhe të mesëm i ka mbaruar në Durrës. Është diplomuar në gjimnazin "Nako Spiru" në Durrës. Ka mbaruar studimet e larta në degën Navigacion me rezultate të shkëlqyera në Shkollën e Lartë të FLD në Vlorë në vitin 1969 dhe është diplomuar si Navigator për Flotën Detare Tregtare.

Në vitin 1971 – 1972 ka ndjekur studimet dega Inxhinieri Mekanike, përsëri me rezultate të shkëlqyera, por me urdhër të autoriteteve të larta partiake të kohës në mënyrë arbitrare iu mohua e drejta e vazhdimit të mëtejshëm të studimeve në këtë degë. Në vitin 1980 përfundoi studimet e larta në Filozofi me rezultate të shkëlqyera.

Është njohës dhe folës i disa gjuhëve të huaja si anglisht, italisht, rusisht. Është autor i disa studimeve në fushën e peshkimit si ndërtim i hartës së parë të relievit nën ujor të detit Adriatik dhe Jon për qëllime peshkimi dhe eksplorator i zonave të reja të peshkimit, vlerësimi i biomasës së ujërave tona detare të zonës ekonomike ekskluzive në detin Adriatik dhe Jon, pjesmarrës dhe kontribues me eksperiencën e njohuritë e tij në ekspeditën e përbashkët shqiptaro – franceze për eksplorimin e koralit të kuq në detrat tanë, bashkëhartues i planeve dhe programeve mësimore për ngritjen e shkollës së mesme të peshkimit në vitin 1980, një shkollë detarie e mirëfilltë.

Bashkëautor i disa teksteve për shkollën e mesme të peshkimit si "Hidrometereologjia Detare", "Arti Detar 1" dhe "Arti Detar 2", bashkëautor i librit "Elementë teorikë të Stabilitetit të Anijes e Zbatimi Praktik". Në vitet 2007 – 2009 ka qenë anëtar i Komitetit të Përputhshmërisë i Planit të Veprimit për Mesdheun me seli në Athinë, i Organizatës së Kombeve të Bashkuara për Mjedisin në rolin e ekspertit shkencor të këtij komiteti.

Gjatë karrierës së tij profesionale ka kryer detyra të larta në administratën shtetërore për një kohë të gjatë si Kryetar Dege dhe Drejtor i Drejtorisë së Peshkimit në Ministrinë e Industrisë së Lehtë dhe Ushqimore, Drejtor Institucionesh administrative dhe projektuese dhe këshilltar ministri. Në vitin 2010 u prezantua me broshurën sprovë "Zgjidhja e një misteri", e cila po i paraqitet lexuesit me këtë botim si një punim kërkimor, ku ndërthuren aspekte të ufologjisë, filozofisë, historisë së lashtë të shqiptarëve dhe misticizmit.

Një përshkrim i shkurtër mbi librin " Zgjidhja e një Misteri " Libri " Zgjidhja e një Misteri" trajton një temë të veçantë dhe tunduese për çdo lexues. Ky libër përbën një produkt me tipare specifike letrare, është një studim mbështetur në evidenca fizike dhe prova reale. Nuk është një libër fantastiko-shkencor megjithëse shumë episode dhe hipoteza qëndrojnë në kufijte e fantazisë të dimensionit që ne përfaqësojmë.

Ato janë dukuri të përmasave të tjera, që shfaqen në dimensionin tonë të egzistencës. Ёshtë produkt i një pune studimore shumëvjeçare, është një ndërthurje e ufologjisë dhe dukurive të marredhënieve të realiteteve të përmasave të ndryshme në univers. Në shumë momente lexuesi ndeshet me përshkrime të fenomeneve që mund të jenë tronditëse për cilindo që lexon këtë libër, por fakti është që ato mbështeten në prova reale apo siç thuhet ne gjuhën shkencore evidenca fizike, pra nuk ka vend për dyshime .

Ndërsa në përgjigje të pyetjes së shumë kërkuar nga mbarë njerzimi nëse jashtëtokësorët janë një realitet apo fantazi, në libër jepen argumente dhe evidenca fizike të egzistencës së një civilizimi teknologjik shumë të avancuar në krahasim me civilizimin tonë, bile autori vjen në përfundimin shumë tronditës ndoshta, që ky civilizim teknologjik egziston, është një realitet objktiv dhe se ne jemi produkt i këtij civilizimi, pra i aplikimit të inxhinierisë gjentike të nivelit më të lartë që ky civilizim jashtëtokësor disponon.

Evidencat fizike janë të botuara për herë të parë dhe përbëjnë një provë dhe zbulim unikal në botë. Me probabilitet të besueshëm, por gjithmonë hipotetik në libër jepet edhe origjina dhe vendndodhja e supozuar e këtij civilizimi teknologjik, i cili konsiderohet si krijuesi i civilizimit tonë teknologjik në planetin Tokë.

Në libër lexuesi do të njihet edhe me mjaft përfundime të tjera shokuese, por përsëri me realitete të bazuara në prova . Ёshtë një realitet i padiskutueshëm që gjuha shqipe është një gjuhë e dhënë nga krijuesi, është një gjuhë "Perëndie" me prejardhje hyjnore, dhe se krijuesi krijoi paraardhësit e shqiptarëve pellazgët hyjnor si shëmbëlltyrë të tij dhe racë të preferuar nga ai.