Vogelushja e Henes se Gjashte, Moony Witcher

Titulli: Vogëlushja e Hënës së Gjashtë
Origjinali: La bambina della Sesta Luna
Gjinia: Roman
Autori: Moony Witcher
Shqipëroi: Agim Doksani
Shtëpia botuese: Pegi
Viti: 2008
Fq. 296
Pesha: 0.321 kg
ISBN: 978-99956-28-38-3

Mbi librin

Nina ndjek mësimet në klasën e pestë, jeton me tetot në Madrid dhe nuk i takon asnjëherë prindërit, sepse ata gjithnjë ndodhen larg, të zënë me punë. Por në dorën e majtë ka atë blanën e kuqe në formë ylli... që ngjason si dy pika uji me blanën e gjyshit të saj të dashur Misha, një alkimist me nam, i cili jeton në Venecia.

Të jetë vallë një shenjë e fatit të saj? Një vogëlushe trupbrishtë e mendjemprehtë fluturimthi mbërthen sfidën e përjetshme mes së Mirës dhe së Keqes. Dashuria e madhe për jetën dhe kërshëria e pakufi janë armët që do t'i nevojiten për të kuptuar dhe më pas për të mposhtur Botën e Territ e për t'i lënë vend Botës së Dritës. Ay ku asgjë tjetër veç magjisë dhe fantazisë nuk mund të krijojë realitetin...

Fragment nga libri

Ishte ora 22:00 e datës 2 qershor kur Nina u ngrit nga shtrati dhe, si ngaherë, e rrëzoi në dysheme Platonin e gjorë. Rendi në banjë dhe teksa shplante duart, vuri re që ylli ishte bërë shumë i madh, aq sa i zinte tërë pëllëmbën e dorës. Dhe ishte pis i zi...kjo nuk i kishte ndodhur kurrë.

"Ylli i zi...Shenja e rrezikut. Çfarë duhet të bëj?", - mendoi me vete. E trembur, rendi drejt e në dhomën e teto Karmenit, që e rroku fort në qafë dhe ia mbështolli dorën me pambuk të njomur me lëngë trëndafili.

Platoni mjaullinte i dëshpëruar dhe kishte hipur mbi dollap, ndërsa Adoni lehte dhe godiste me putra derën, si të donte të dilte një çast e më parë. Karmeni nuk dinte si ta qetësonte Ninën dhe kafshët. Dukej sikur atë natë kishte shpërthyer një ferr i vërtetë.Dhe kjo ishte e vërtetë, ferri ishte aty, endej në ajrin rreth e qark.