Tre qeshin, një inatoset, Dritëro Agolli

Titulli: Tre qeshin, një inatoset

Origjinali: Tre qeshin, një inatoset

Gjinia: Roman

Autori: Dritëro Agolli

Shtëpia botuese: Botimet Dritero 

Viti: 2019

Fq. 135

Pesha: 0.195 kg

ISBN: 978-99927-34-76-6

Mbi librin

Të kujtohet Bamkë, sa herë të kam gjetur të përkulur në tabanin e kopshtit tënd duke mbjellë me kujdes gërma, rrokje, rima, vargje e duke korrur vjersha e poema të shëndetshme e të pastra si ajo dëbora në majën e maleve, e na gostit me libra të mira nga kopshti yt. 

Por dije, se nuk është vetëm kopshti yt i vjershërisë o Bamkë Çomaga, se ka edhe kopshte të tjerë. Ja, aty ku fërfërijnë krahët pëllumbat e turtujt dhe nisen drejt reve ku çel ylli i mëngjesit, ku fryn zefir, fërfërimë, shtrëngata, stuhi, nga vjen erë limon, borigë e rrëshirë, janë kopshtet e miqve tanë të vjetër. Njëri e ka kurdisur kopshtin e tij buzë një ”liqeni” ku “hesht një lopatë” dhe “një shqiponjë e arratisur fluturon në Mal të Thatë”, dhe tjetri buzë një liqeni tjetër, ku mërzen cjapi e ku zihet krapi.“ ... Sa shumë janë o Bamkë, e ku i numëroj dot të gjithë unë i gjori. Të rrimë shtrembër e të flasim drejt. Të gjithëve s’ia u ha kollaj qeni shkopin. Secili e ka thurur mirë e bukur kopshtin e tij dhe i bën hyzmet çdo vit e më shumë. Nga tre katër herë qilizmë e kanë punuar, kush më thellë e kush më cekët, sipas takatit. Edhe shëndet kanë, edhe bereqet. 

Po lëre , Bamkë, kam një shqetësim këtu në zemër. Ty të vajti nofulla mënjanë kur more vesh një hap të pamatur të Lulushes tënde, që vajti e u ankua në Lidhjen e Shkrimtarëve, se s’po të lidhnin me anëtarësi e s’po të jepnin leje krijuese të krijoje vjersha, por mua më ka mbetur qafa shtrembër, duke shikuar disa vjershëtorë që, hop, kapërcejnë gardhet e kopshteve të botës e hyjnë brenda.