Historia e lëvizjes së majtë në Shqipëri 1878 – 1941, Kristo Frashëri

Titulli: Historia e lëvizjes së majtë në Shqipëri dhe e themelimit të PKSH – së 1878 – 1941
Origjinali: Historia e lëvizjes së majtë në Shqipëri dhe e themelimit të PKSH – së 1878 – 1941
Gjinia: Histori
Autori: Kristo Frashëri
Shtëpia botuese: Akademia e Shkencave të Shqipërisë
Viti: 2006
Fq. 472
Pesha: 0.766 kg
ISBN: 978-99943-909-3-7

Mbi autorin

Kristo Frashëri ka lindur në Stamboll më 4 dhjetor 1920 nga prindër shqiptarë me origjinë nga fshatrat e Përmetit. Është riatdhesuar familjarisht më 1927 duke u vendosur në Tiranë. Këtu ai ka kryer filloren dhe shkollën e mesme. Kur ishte ende i ri, në vitet '30 të shekullit të kaluar, nxënës në Gjimnazin e Shtetit, përqafoi idetë majtiste.

Në kohën e themelimit të Partisë Komuniste Shqiptare (8 nëntor 1941), student universitar, ishte anëtar i Grupit Komunist të të Rinjve. Ndonëse i ri, pati mundësi të ndiqte me vëmendje dhe interesim të veçantë procesin e themelimit të saj. Është nga anëtarët e parë të PKSH – së që u përjashtua prej saj (qershor 1942).

Pavarësisht nga përjashtimi mori pjesë në Luftën Nacionalçlirimtare. Pas përjashtimit nga Partia hoqi dorë nga jeta politike. Pas çlirimit punoi për disa vite në Bankën e Shtetit Shqiptar. Krahas punës u angazhua në fushën studimore. Punimet e tij të para, ende të pabotuara, trajtonin aspekte të historisë monetare dhe bankare. Që nga viti 1950, sidomos që nga viti 1953 kur kaloi në Institutin e Shkencave, iu kushtua studimeve të mirëfillta historike. Ka trajtuar tema të të gjitha periudhave.

Një nga dëshirat e tij të hershme ka qenë ndriçimi i historisë së lëvizjes së majtë në Shqipëri dhe e themelimit të PKSH – së, të cilat kanë qenë të pasqyruara në mënyrë jo të plotë dhe jo të saktë në historiografinë qoftë komuniste, qoftë antikomuniste. Me këtë vepër ai ka realizuar dëshirën e tij të vjetër.

Në këtë trajtesë është mbështetur kryesisht në burimet dokumentare të kohës së ngjarjeve dhe në dëshmitë e shkruara nga protagonistët e tyre, disa nga të cilat i ka përmbledhur në pjesën e dytë të vëllimit. Krahas burimeve ai ka shfrytëzuar dhe njoftimet që ai vetë ka mbledhur nga bisedat me protagonistët e ngjarjeve, të cilët ka pasur fatin t'i njohë personalisht. Megjithatë themelet e këtij punimi i përbëjnë kryesisht burimet e shkruara dokumentare të kohës së ngjarjeve.