Lord Xhim, Joseph Conrad

Titulli: Lord Xhim
Origjinali: Lord Jim
Gjinia: Roman
Autori: Joseph Conrad
Shqipëroi: Zef Simoni
Shtëpia botuese: Pegi
Viti: 2016
Fq. 404
Pesha: 0.443 kg.
ISBN: 978-9928-200-63-1

Mbi librin

Xhimi është një djalosh me sedër dhe imagjinatë të fortë, që vesh çdo gjë me një tis të mjegullt romantizmi. Ai e sheh veten si një hero të pagabueshëm. Prandaj edhe turbullohet kur papritur dhe vetvetishëm braktis një anije në rrezik mbytjeje.

Tashmë një njeri tërësisht i kapluar nga ndjenja e fajit, ai do ta kalojë gjithë jetën duke u munduar të vërë në vend nderin dhe personalitetin e tij. Conrad – i ka hulumtuar thellësisht çështjet e ndërlikuara të nderit të humbur dhe fajit, shpagimit dhe heroizmit.

Fragment nga libri

E ndieja se po rrekej të më bënte të kuptoja të Pakuptueshmen; e nuk di të ketë gjë që të krahasohet me vështirësinë e këtij ndijimi. Po më bënte të shikoja disa gjëra që fshihen pas çdo të vërtetë dhe pas thjeshtësisë thelbësore të së pavërtetës.

Ai sikur u drejtohej të gjitha anëve të çështjes në të njëjtën kohë – anës që i kthehej përherë dritës së diellit dhe asaj ane të natyrës sonë që, si gjysmërruzulli tjetër i Hënës, gjallon tinëzisht në errësirë të përjetshme, vetëm me një dritë të hirtë e të frikshme, që i bie nganjëherë anash.

Ngjarja ishte e paqartë, e parëndësishme – po të doni: një i ri i humbur, një në një milion – po ai ishte nga tanët; një ngjarje aq e parëndësishme sa dhe përmbytja e një foleje milingonash, por, megjithatë, e fshehta e qëndrimit të tij më krijonte përshtypjen sikur ai të kishte qenë një krijesë që përfaqësonte të gjitha krijesat e tjera, sikur e vërteta e saj e errët të ishte aq e rëndësishme sa të përfshinte edhe mendimin që njerëzimi ka për veten e vet...

Komente mbi librin

"Lord Xhim" nuk i përket asnjë periudhe specifike, sepse është një prozë e pakohë, nga më madhështoret..."

Library Journal

"... Një kryevepër rrëfimesh të ndërlidhura, një triumf i kapërcimesh kohore... Si shumë nga veprat e Conrad – it, dëshmon për fuqinë shkatërrimtare të ëndrrave, megjithëse askush nga ne nuk mund t'i shmangë vërtet iluzionet romantike."

The Washington Post

"Kurrë më parë nuk kanë qenë më të bukura dhe magjepsëse fjalitë dhe atmosfera e krijuar nga Z. Conrad... Një libër i cilësisë letrare si "Lord Xhim" duhet pritur me mirënjohje dhe hare."

The New York Times