Eter dhe bij, Ivan Turgenjev

Titulli: Etër dhe bij
Gjinia: Roman
Autori: Ivan Sergejeviç Turgenjev
Shqipëroi: Edlira Llukaçaj
Shtëpia botuese: Zambaku
Viti: 2007
Fq. 272
Pesha: 0.34 kg
ISBN: 978-99956-08-08-8

Mbi librin

Në kryeveprën "Etër dhe bij", Turgenjevi me një stil të jashtëzakonshëm na paraqet konfliktin midis brezave në Rusinë e shek. XIX. Në libër do të lexoni vitet e ndryshimit të përplasjeve shoqërore, konfliktet midis fisnikëve dhe shtresave të varfra, mes të rinjve dhe të moshuarve si dhe do të njiheni me krizat dhe dashuritë e një rinie që mohon çdo lloj vlere.

Romani është bërë i famshëm jo vetëm si përfaqësues i denjë i një letërsie të re që po lindte ndjenja të larta estetike dhe shpirtërore siç ishte letërsia e re ruse por dhe sepse në të përshkruhen si ngjarje kryesore kontradiktat midis brezave.

Personazhi kryesor i romanit Bazarovi një i ri fisnik rus i përket rrymës filozofike të nihilizmit dhe për rrjedhojë ai përçmon dhe nënvlerëson idetë e vjetra të prindërve të tij. Ajo çka ndodh në fakt në roman nuk ishte një fenomen i ri që i përkiste vetëm shoqërisë ruse të kohës por ashtu si e theksojnë shumë antropologjistë dhe sociologë modern ishte një pasqyrim i idesë se revolta e parë e njeriut është ajo ndaj autoritarizmit të prindërve të vet.

Mbi autorin

Ivan Sergejeviç Turgenjev lindi në një familje të pasur dhe aristokratike më 1818. Që në fëmijëri u përball me problemet e skllavërisë. E ëma sillej keq me skllevërit, i keqtrajtonte dhe i dënonte. Kur e ëma filloi të përdorte këto metoda dhune edhe mbi fëmijët, Turgenjevi u largua nga shtëpia dhe vetëm pasi ajo i premtoi që këto ngjarje s'do të përsëriteshin më, u kthye.

Këto gjurmë të thella që i la fëmijëria bënë që Turgenjevi në librat e tij t'u jepte vend problemeve në lidhje me skllavërinë, tokat e pronarëve të tyre, si dhe me aristokracinë. Turgenjevi, si biri i një të pasuri, u shkollua në kolegje private, nga ku më pas u largua për ta vazhduar edukimin e tij në shtëpi me mësues të posaçëm.

Qysh në fëmijëri mësoi gjuhën franceze, angleze dhe gjermane. Pasi u diplomua në filozofi, Turgenjevi shkoi në Gjermani, ku mësoi latinishten dhe greqishten e vjetër. Sapo u kthye në Rusi, botoi librin e parë: "Nga shënimet e një gjuetari". Kjo vepër, kushtuar filozofit dhe shkrimtari të madh Gogol, pas vdekjes, qe dhe arsyeja e burgosjes së tij.

Turgenjevi, pas lirimit, kaloi edhe 18 muaj të tjerë në survejim të plotë. Vepra "Etër dhe bij" fillimisht u botua në një revistë në 1862, për t'u përmbledhur më vonë në një libër. Një vit pas botimit të parë, kjo vepër e mirënjohur u përkthye në frëngjisht, gjermanisht dhe anglisht. Turgenjevi vdiq në Francë, më 3 shtator 1883. Trupi i tij i pajetë u soll në Rusi dhe u varros në Petërburg.