Dublinasit, James Joyce

Titulli: Dublinasit

Origjinali: Dubliners

Gjinia: Tregime

Autori: James Joyce

Përktheu: Idlir Azizi

Shtëpia botuese: Zenit

Viti: 2004

f. 282

Pesha: 0.29 kg

ISBN: 99927-948-1-x

Mbi librin

Ky libër përmban 15 tregime, të cilat zënë fill me një rrëfim për ditët e fundit të një plaku me paralizë, por paraliza këtu sikur mëton të shënjojë një vend, një gjendje të përgjithshme, një shoqëri, shkurt: ndryshkun e një shoqërie.Nga tregimi në tregim parakalojnë portrete personazhesh, mosha e të cilave lëviz nga fëmijëria tek adoleshentët, nga rinia te pleqtë, por edhe te të vdekurit. Një pjesë e personazheve janë jetimë, me gjysh e pa baba.Pothuaj të gjitha tregimet mbyllen papritmas, me ndonjë fjali të pa artikuluar mirë. Vendodhja e tregimeve është Dublini dhe, po të parafrazojmë fjalët e autorit, ai kishte qëllim të shkruajë një histori morale të vendit të vet dhe kishte zgjedhur Dublinin, sepse ky qytet atij i dukej qendra e paralizës.

Në këtë libër zënë fill përdorimet e rrafsheve të shumta kuptimore në shkrimin xhojsian si dhe proza e rrjedhës së ndërdijes, që u bënë shënjuese të prozës moderne në shekullin e kaluar.Në tregimet e Joyce-it mbizotëron një atmosferë e ftohtë, bojëkafe, e rëndë, shumica e tregimeve mbyllen me vdekje, me dështim, me një gjëllim pa perspektivë. Në këto tregime përvijohen edhe mjaft aludime seksuale.Një pjesë e këtyre personazheve, si Lenehani, Martin Kaningami, Gabriel Konroi, shfaqen edhe në prozën më komplekse të shekullit XX, në romanin “Uliksi”.Autori i shkruante botuesit konservator, për “Dublinasit”: “E kam vënë këtë krizë para pasqyrës sime të pastruar mirë. Nëse ju do të vendosni të mos e botoni librin, të jeni të sigurt që do të mbeteni përgjegjës për vonesën e civilizimit në Irlandë”. Leximi i tregimeve “Dublinasit” lexuesit i shërben si një parapërgatitje për të hyrë në botën e madhe të prozës moderne xhojsiane, e cila u kthye në mit të shekullit njëzet.  - Sali Bytyçi