Titulli: Epoka e Gurit dhe Shqipëria
Origjinali: Epoka e Gurit dhe Shqipëria
Gjinia: Histori, arkeologji
Autori: Ilir Gjipali
Shtëpia botuese: Botart
Viti: 2012
Fq. 320
Pesha: 0.79 kg
ISBN: 978-9928-116-19-2
Mbi librin
Qeniet njerëzore ekzistojnë në Tokë prej të paktën 2.5 milionë vjetësh, që kur filluan të përgatitnin dhe përdornin vegla pune. Të dhënat arkeologjike dhe ato të disiplinave të tjera që veprojnë në këtë fushë mundësojnë studimin për origjinën e njeriut, popullimin e botës, fillimin e prodhimit të ushqimit, si dhe nisjen e qytetërimit.
Arkeologjia prehistorike është e vetmja midis disiplinave që na jep kronikën e ndryshimeve biologjike dhe kulturore për periudha të gjata kohore. Brenda dy dekadave të fundit janë bërë një numër zbulimesh vërtet të rëndësishme të lidhura me evolucionin e njeriut dhe paraardhësve të tij.
Zbulimi i mbetjeve humane veçanërisht të Pleistocenit të Afrikë, Europës dhe Australisë, kanë përforcuar e rivlerësuar pikëpamjet për origjinën e njeriut dhe për të shkuarën e sjelljes njerëzore. Ato mbështesin idenë që evolucioni njerëzor përgjatë disa miliona vjetësh është një histori komplekse e përcaktuar nga një shumëllojshmëri e konsiderueshme speciesh.
Libri "Epoka e Gurit dhe Shqipëria" jep njohuri themelore për prehistorinë nëpërmjet veprimtarisë kërkimore – studimore dhe rezultateve të deritanishme të Arkeologjisë së Prehistorisë në shkallë të përgjithshme, rajonale dhe për Shqipërinë.
Mbi autorin
Arkeolog në fushën e Prehistorisë që nga viti 1983 në Institutin e Arkeologjisë të Qendrës së Kërkimeve Albanologjike në Tiranë. Në vitet 1997 – 2008 ishte Zv/ drejtor i Institutit të Arkeologjisë dhe nga viti 2011 përgjegjës i Departamentit të Prehistorisë.
Gjatë periudhës 1983 – 2010 ka marrë pjesë në 50 ekspedita arkeologjike, drejtues e bashkëdrejtues në 13 projekte kërkimore nga të cilat 6 me partnerë të huaj. Gjatë dekadës së fundit kërkimet e tij në terren janë zgjeruar duke pasur si objekt studimi gjithë Epokën e Gurit (Paleoliti, Mezoliti dhe Neoliti).