Si te dashurosh nje burre te veshtire, Nancy Good

Titulli: Si të dashurosh një burrë të vështirë
Origjinali: How to love a difficult man
Gjinia: Psikologji
Autori: Nancy Good
Shqipëroi: Agim Doksani
Shtëpia botuese: Uegen
Viti: 2003
Fq. 212
Pesha: 0.274 kg
ISBN: 978-99927-54-39-7

Fragment nga libri

A do të arrini ndonjëherë të merrni atë që dëshironi nga "Burri i jetës suaj?" Një burrë i vështirë është i këndshëm e i urryer njëherësh, i ëmbël dhe i ashpër, joshës dhe acarues, i qëndrueshëm dhe rraskapitës, egoist dhe bujar, zemërgur dhe plot përkujdesje. Më pak fjalë, është kundërshtia vetë. Për një çast ju duket sikur po fluturoni nga gëzimi dhe sakaq ju kaplon vuajtja e zemërata. Dhe më e keqja është se ju vazhdoni ta doni pavarësisht nga këto, madje keni nevojë për të.

Të paktën sot, nesër nuk dihet. Kurrë nuk jeni të sigurta nëse doni, përse e dashuroni, nëse vërtet keni nevojë për të, apo është thjesht forcë zakoni. Veç një gjë është e sigurt: ai ka qenë dhe mbetet tejet i rëndësishëm për jetën tuaj, herë për të mirë e herë për të keq.

Është burri juaj i vështirë ? Po të pyesni një grup grash, nëse janë të martuara, apo bashkëjetojnë me një burrë të vështirë, thuajse të gjitha do t'ju përgjigjen po. Kjo pjesërisht shpjegohet me faktin se, shoqëria jonë nxit burrat të sillen krejt ndryshe nga ç'e përfytyrojnë gratë burrin e ëndrrave të tyre.

Prindërit mund ta qortojnë djalin e vogël, që të kthehet në shtëpi pas lojës, me rrobat e grisura e të zhyera në baltë, mund ta qortojnë për pakujdesin etj., por hollë-hollë i japin të kuptojë se bëmat e tij i kanë hije një burri të vërtetë. Ndërsa për vajzat, është bërë zakon që të nxiten të jenë sa më të edukuara, të tregojnë kujdes në radhë të parë për të tjerët pastaj për veten, të jenë të sjellshme e të urta dhe ta mbyllin gojën.

Asnjëherë të mos kërkojnë ndonjë gjë, sidomos për vete. Edhe pse këto 20 vjetët e fundit feminizmi i ka bërë më të vetëdijshme gratë për mundësitë apo forcën e tyre, për pikësynimet që duhet t'i vënë vetes, vite të tëra të ngjizjes kulturore dhe të ndikimit të skemave familjare kanë lënë tek ato një vragë të thellë....