Masa dhe pushteti, Elias Canetti, vol. 2

Titulli: Masa dhe pushteti, vëllimi i dytë
Origjinali: Masse und Macht
Gjinia: Filozofi
Autori: Elias Canetti
Shqipëroi: Aristidh Ristani
Shtëpia botuese: Elena Gjika
Viti: 2007
Fq. 363
Pesha: 0.401 kg.
ISBN: 978-99943-963-4-4

Mbi librin

Në vëllimin e dytë të veprës "Masa dhe pushteti", Elias Kaneti analizon me hollësi "pushtetin", i cili lidhet ngushtë me "masën". Autori i ilustron gjithmonë hulumtimet e veta me shembuj të shumtë dhe tepër interesantë nga historia e njerëzimit.

Ndër çështjet më mbresëlënëse që trajtohen në vëllimin e dytë të kësaj kryevepre sociologjiko – filozofike të Kanetit janë: i mbijetuari në besimet e popujve primitivë, dhuna dhe pushteti, urdhri, negativizmi dhe skizofrenia, masa dhe metamorfoza në delirium tremens, figura dhe maska, lavdia, idetë e madhështisë te paralitikët, pushteti dhe paranoja etj.

Kaneti përshkruan, ndër të tjera, mbretër afrikanë dhe aziatikë dhe sundimtarë të lashtësisë, megjithëse nuk bën shprehimisht krahasime me sundimtarë të kohërave moderne, por këtë gjë ia lë lexuesit. Në të gjithë shembujt e cituar prej autorit, lexuesi ndien ashtu vetvetiu nevojën për të zhbiruar midis rreshtave.

Autori vetëm sa orienton, duke ia hapur sytë lexuesit për çështje që ky i fundit nuk do t'i shihte nga një këndvështrim i tillë. Kjo ndikon që vepra në fjalë të jetë përherë aktuale dhe që çdo brez i ri të zbulojë aty gjëra që do ta ndihmojnë të bëjë krahasime me aspekte të ndryshme të shoqërisë ku jeton.

Mbi autorin

Elias Kaneti lindi më 1905 në Rusçuk të Bullgarisë (sot ruse), në një familje të lashtë e të pasur hebraike me prejardhje spanjolle. Në vitin 1911, prindërit e tij shkuan së bashku me tre fëmijët e tyre në Mançester të Anglisë, kurse më 1913, pas vdekjes së parakohshme të babait të Kanetit, familja u shpërngul përfundimisht në Vjenë e më pas në Cyrih të Zvicrës.

Në kryeqytetin austriak, Kaneti studioi gjer më 1929 në fakultetin e shkencave të natyrës, ndërsa më pas mori edhe titullin e doktorit të shkencave filozofike. Në vitin 1938, u largua nga Austria dhe jetoi e punoi si shkrimtar i lirë në Londër e në Cyrih, ku edhe vdiq në vitin 1994.

Si romancier, dramaturg, eseist e sociolog, ai është nderuar me çmime të larta në vende të ndryshme të Europës dhe i janë dhënë tituj nderi nga disa universitete europiane. Elias Kanetit, të cilin kritika e ka quajtur si një "klasik të gjallë" dhe si një prej humanistëve më të mëdhenj të shekullit të njëzetë, iu dha Çmimi Nobel për letërsinë në vitin 1981.