Mbi lirinë, John Stuart Mill

Titulli: Mbi lirinë
Origjinali: On Liberty
Gjinia: Filozofi
Autori: John Stuart Mill
Shtëpia botuese: Julvin 2
Viti: 2015
Fq. 146
Pesha: 0.221 kg.
ISBN: 978-9928-137-31-9

Fragment nga libri

Po pse? (mund të pyetet), a është mungesa e njëzëshmërisë një kusht i domosdoshëm për dijen e vërtetë? A është e nevojshme që një pjesë e njerëzve të këmbëngulin në të gabuarën për të mundësuar kuptimin e të vërtetës? A pushon së qeni real dhe jetik një besim me t'u pranuar gjerësisht – dhe a është kuptuar dhe ndjerë ndonjëherë tërësisht një pohim pa mbetur pak dyshim në të?

Fill pasi njerëzit kanë pranuar njëzëri një të vërtetë, a shuhet e vërteta brenda tyre? Deri më sot është menduar se qëllimi më i lartë dhe rezultati më i mirë për një inteligjencë të përmirësuar do ishte të bashkoheshin njerëzit gjithnjë e më shumë në njohjen e të gjitha të vërtetave të rëndësishme.

Po a zgjat inteligjenca vetëm për aq kohë sa nuk e ka arritur qëllimin e saj? A shuhen frytet e pushtimit me arritjen e fitores?

Ai që zgjedh vetë planin e jetës, i përdor të gjitha aftësitë e veta. Njeriu duhet të përdorë vëzhgimin për të kuptuar, arsyetimin dhe gjykimin për të parashikuar, veprimin për të mbledhur materiale për vendim, diferencimin për të vendosur, dhe kur ka vendosur, qëndrueshmërinë dhe gjakftohtësinë që t'i përmbahet vendimit që ka paramenduar.

Këto cilësi i nevojiten dhe i ushtron saktësisht në masën në të cilën përcakton sjelljen e vet sipas gjykimit dhe ndjenjave të veta.