Oksidentalizmi, Ian Buruma, Avishai Margalit

Titulli: Oksidentalizmi, Perëndimi dhe armiqtë e tij
Origjinali: Occidentalism: a short history of anti - westernism
Gjinia: Shkenca politike
Autori: Ian Buruma, Avishai Margalit
Shqipëroi: Piro Misha
Shtëpia botuese: IDK
Viti: 2011
fq. 132
Pesha: 0.151 kg
ISBN: 978-9928-4051-5-9

Mbi librin

Njëzet vjet të shkuara, kur Edward Said shkroi librin e tij "Orientalizmi", për mënyrën sesi Perëndimi e sheh Lindjen, ky libër ngjalli një debat të nxehtë, i cili vazhdon edhe sot e kësaj dite. Por deri më sot, pak kush është marrë me mënyrën sesi e kanë parë "Perëndimin" armiqtë e tij të vetëshpallur.

Pikërisht këtë synon të bëjë "Oksidentalizmi", një hetim origjinal i stereotipeve armiqësore ndaj botës perëndimore, që në fakt kanë ushqyer urrejtjen e lëvizjeve të tilla si Al Kaeda. Në këtë libër, Ian Buruma dhe Avishai Margalit argumentojnë se ndonëse virusi anti – perëndimor ka gjetur terren pjellor në disa pjesë të botës islamike, në të vërtetë zanafilla e tij nuk është aty, por në Europë.

Duke ndjekur rrugëtimin e këtyre pikëpamjeve që nga Kundër – Reforma në Europë, te variantet e shumtë me të cilët u shfaq fashizmi në Lindje dhe Perëndim, deri tek ekstremizmi i sotëm anti – kapitalist dhe me karakter fetar, ky libër na tregon sesi kamikazët dhe luftëtarët e sotëm të shenjtë, ushqehen nga ide të cilat, në të vërtetë, kanë patur një histori.

Koment nga The Economist

"Një libër i ngjeshur, elegant, por në të njëjtën kohë sfidues. Një përpjekje për të na treguar se cila është ideologjia që motivon terrorizmin, duke e vendosur atë në një kontekst historik. Autorët ia kanë dalë mbanë të na japin një vepër të mrekullueshme, ku kombinohet analiza e një sërë shoqërish dhe kulturash, me çështje të tilla si ajo e kujtesës kolektive, e fajit apo e shpagimit."

Mbi autorët

Ian Buruma (1951), shkrimtar, akademik, gazetar holandezo – anglez. Në qendër të veprës së tij janë marrëdhëniet kulturore dhe politike mes qytetërimit perëndimor dhe qytetërimeve lindore. Në vitin 2008 fitoi çmimin Erasmus për kontributin e tij të veçantë për kulturën dhe shkencat sociale në Europë. Në vitin 2010, revista prestigjioze Foreign Policy e shpalli si një ndër 100 mendimtarët më me ndikim në botë.

Avishai Margalit (1939) filozof izraelit, profesor i filozofisë në Universitetin e Prinstonit, SHBA, si dhe në atë të Jeruzalemit.