Autoritarizem ne tranzicion, Perparim Kabo

Titulli: Autoritarizëm në tranzicion - Antropologjia shqiptare përmes globalizmave
Origjinali: Autoritarizëm në tranzicion - Antropologjia shqiptare përmes globalizmave
Gjinia: Shkenca sociale
Autori: Përparim Kabo
Shtëpia botuese: Plejad
Viti: 2006
fq. 472
Pesha: 0.62 kg
ISBN: 978-99943-903-2-5

Fragmente nga libri

Universaliteti mitik parahelen i antropologjisë pellazgjike është formë e kompletuar e shpjegimit ontologjik dhe gnoseologjik të universit, natyrës, njeriut, jetës dhe shpirtit njerëzor. Mbizotëron në këtë produkt shekullor mbingarkesa antropologjike dhe humanizmi, liria dhe kulti i së vërtetës, sinqeriteti dhe grishja e habisë...

Një sistem i ri shoqëror, sado demokratik të jetë në raport me atë që lë pas, nuk mundet kurrsesi të definohet plotësisht si i tillë me antropologjinë e djeshme. Kjo e fundit e realizon këtë detyrim historik për aq sa është e civilizuar të zotërojë ligjësitë dhe detyrimet, që rrjedhin prej sistemit të ri, për aq sa e pranon sfidën e kostos sociale, morale dhe atë të interesave...

Të përfshihesh në magmën e globalizmit, do të thotë jo thjesht të jepesh për të humbur në oqean, por të gjesh orientimin, drejtpeshimet dhe pikërëndesat. Në një përzierje të tillë dinamike, ku konkurrenca të rrëzon, shtetit i kërkohet gjykim i ftohtë, largpamës dhe kujdes maksimal...

Tipari i identifikimit sasior dhe vlerësues monetar të ndjenjave ka bërë delegimin e njerëzores, nga ambienti natyror i marrëdhënieve ideore ndjenjësore te tregu i objekteve. Sendi nuk është marrëdhënie dhe marrëdhëniet nuk duhet të sendërtohen në objekte, pasi kjo e ka shndërruar individin, duke e vënë në një raport shumë delikat "të jesh ai çfarë ke"...

Mbi autorin

Përparim Kabo ka lindur në Tiranë në 23 gusht 1954. Kryen studimet e larta në Universitetin e Tiranës në degën e filozofisë të cilat i përfundon me rezultate shumë të larta në vitin 1977. Për më shumë se një dekadë jep mësim, fillimisht për pak vite në arsimin e mesëm, më tej në arsimin e lartë duke u thelluar në punën shkencore.

Fillimisht me gradën "kandidat i shkencave" dhe më tej në vitin 1996 "Doktor i shkencave filozofike". Në fillim të viteve 90', esetë e tij si: "Toleranca, tipar i subjektit të kulturuar", "Shteti ligjor përpara voluntarizmit", "Pa inteligjencën, shoqëria ecën në kahe të kundërt me progresin" etj. finalizohen në mars 2001 me librin e tij të parë: "Antropologji pa sistem".

Libri u mirëprit për stilin argumentativ, infromacionin e gjerë si dhe për mënyrën elegante të të rrëfyerit. Në fund të tij autori boton një shkrim të gjatë me titull: "Antropologjia e sotme shqiptare, pasojë e sistemeve të munguara". Duket sikur ai paralajmëronte apo parashikonte diçka të thellë. Kështu ndodhi, pasi sot autori sjell librin që mbart tezën e vet filozofike "Autoritarizëm në tranzicion", tezë të cilën ai e ballafaqon me antropologjinë shqiptare në linjën historike dhe në marrëdhëniet e saj me globalizmin.