Ekonomia politike globale, Robert Gilpin

Titulli: Ekonomia politike globale
Origjinali: Global political economy: understanding the internacional economic order
Gjinia: Ekonomi
Autori: Robert Gilpin
Shqipëroi: Fatmir Zanaj
Shtëpia botuese: ISP & Dita 2000
Viti: 2009
Fq. 524
Pesha: 0.646 kg.
ISBN: 978-99943-57-89-5

Mbi librin

Ky libër i shumëpritur i Robert Gilpin – it përmbledh përpunimin e mëtejshëm të ideve të librit të tilë të mëparshëm "Ekonomia politike e marrëdhënieve ndërkombëtare", një punim klasik ky në fushën e ekonomisë politike ndërkombëtare, që vazhdon të mbajë të mbërthyer vëmendjen e studiuesve, e punonjësve kërkimor – shkencorë dhe të atyre që bëjnë politika shtetërore.

Ekonomia dhe sistemi politik botëror kanë ndryshuar në mënyrë dramatike që prej vitit 1987 kur u publikua ai libër. Përfundimi i Luftës së Ftohtë ka çliruar dhe ka hedhur në veprim forca të reja ekonomike e politike, në kohën kur janë shfaqur dhe dukuri të reja të rajonalizmit.

Fuqia e kompjuterit po bëhet po bëhet përherë e më shumë një nxitje e madhe e zhvillimit të ekonomisë botërore, ndërsa zhvillime teknologjike kanë ndryshuar dhe po ndryshojnë dita – ditës çdo aspekt të marrëdhënieve ekonomike ndërkombëtare.

Libri i ri i Gilpin – it "Ekonomia politike globale" merr në analizë të gjitha këto zhvillime. Duke pasqyruar përvojën e një specialisti që ia ka kushtuar jetën e vet këtij profesioni, libri u ofron lexuesve një punim kërkimor mjeshtëror mbi qasjet e përdorura deri tani për kuptimin dhe shpjegimin e marrëdhënieve ekonomike ndërkombëtare, si dhe të problemeve me të cilën po ballafaqohet sot ekonomia botërore.

Gilpin përqendrohet në shpjegimin e forcave të mëdha ekonomike, politike dhe teknologjike, që kanë transformuar botën. Ai i kushton vëmendje të posaçme globalizimit ekonomik, rrjedhojave dhe implikimeve të tij reale dhe imagjinare në jetën ekonomike, si dhe të shkallës në të cilën janë ekzagjeruar e keqkuptuar natyra, përmasat dhe rëndësia e tyre.

Po ashtu, ai provon se politikat kombëtare dhe ekonomitë vendase mbeten përcaktori më i rëndësishëm i marrëdhënieve ekonomike, i realitetit ekonomik ndërkombëtar. Ky libër vë theksin edhe te rëndësia e rajonalizmit ekonomik, e korporatave shumëkombëshe dhe e trazirave financiare.

Në diskutimin e tij mbi ekonominë politike globale, Gilpin gërsheton analizën ekonomike me atë politike, si dhe shfrytëzon idetë e teorisë konvencionale të tregtisë ndërkombëtare, analizat e thelluara të teorisë së organizimit industrial dhe të teorisë së rritjes endogjene.

Krahas tyre, janë shfrytëzuar edhe ide nga shkenca politike, historia dhe nga disiplina të tjera, që e kanë pasuruar thelbin e kuptimit të rendit të ri ekonomik ndërkombëtar, të paraqitur në këtë libër. Ky është libër me horizonte të gjera intelektuale dhe është i destinuar të bëhet një pikë referimi në këtë fushë studimi.

Koment nga Robert O. Keohane

Ekonomia politike globale është një studim tërësor i aspekteve madhore të ekonomisë politike të botës së sotme nga këndvështrimi i një specialisti "realist", lider në shkencën politike. Robert Gilpin vë theksin te rëndësia e përhershme të shtetit dhe te ndikimi i madh i larmisë së strukturave dhe politikave shtetërore në mbarë botën.

Libri i tij është një tentativë mbresëlënëse për të sintetizuar analizën ekonomike me atë politike për të shpjeguar thelbin e forcave që ndikojnë në procesin e globalizimit, në politikat shtetërore dhe në rezultatet e ndërveprimit të tyre për zhvillimin ekonomik të tregtisë, investimeve dhe për financat ndërkombëtare.